生活炒雜碎(第十五回: 看圖作文)

公司年年都會出公司月曆送俾人, 舊年果盒朱古力真係玩死人. 今年終於用番少少腦, 用"wet floor"告示牌變成月曆, 好鬼sharp醒.
############################################舊年迷上食米線, 差唔多一個星期梗有一兩餐晏晝食米線. 唔知係咪咁公司附近突然開左幾間米線專門店, 其中一間仲玩會員制吸印仔. 食滿20碗就送一碗, 結果同事一呼百應下, 一個月內已經送左兩碗免費米線. 呢間叫"樂林"(我笑住話係咪羅樂林開架?), 質素唔差, 幾有水準添.
############################################同事farewell, 以往只識去飲茶, 今次新人事新作風, 拉大隊去Outback食lunch. 原來Outback有set lunch, 都係六七十蚊有湯有沙律仲有野飲添! 確實比晚市經濟. 叫左個澳坊漢堡, 大份到無輪, 抵!
############################################
舊病復發, 過去果兩個星期確實好辛苦, 乜野都做唔到. 再加上無厘頭身患怪病, 走左去做兩次小手術, 就更加令我情緒低落.
黎緊聖誕我地落實出門走走散下心, 希望對我有所幫助.

生活炒雜碎(第十四回)

前日返工, 響電梯大室赫見老細被救護員檯走送上救護車. 尤其見老細面青口唇白, 仲好似無知覺添真係嚇死我. 即刻車轆腳衝上公司又見成層既同事戴上口罩, 心諗唔係老細中左招卦? HR同事話老細只係好唔舒服, 但為左安全起見, 所以都係做足預防準備戴晒口罩. 可惜香港人就係咁, 少少野就驚到失控, 不出一個鐘, 全公司果十層樓成千人就流傳我地老細中左H1N1, 所以我地戴口罩同要隔離! 我甚至收到其他樓層既同事來電問老細係咪真係中左, 當然俾我鬧到落荒而逃. 不過我都等緊老細有乜最新消息.
直到傍晚, 老細向大家發出電郵話自己只係傷風未好晒再加胃病先至被送入院, 而家佢再做埋H1N1測試, 結果會呢兩日出黎, 我地就睇下老細星期一有無番工就知.
#############################################
事隔一年, 我響公司又掉位, 今次又回到窗口. 檯面面積"疑似"多左, 實質檯底空間就細左, 對於我呢個高人黎講, 差不多次次出入雙腳都撞到野.
#############################################
以往住響舊居, 要食D乜野都可以到樓下幾個大商場, 只係幾分鐘時間. 但係自從去年搬到新居, 因為屋苑並無任何商店, 要買野食野就要行20分鐘回到舊居既商場, 都幾唔方便. 所以自此愛上叫外賣.
屋企長年累月都有唔同外賣餐單, 老麥/KFC/Pizza Hut/Pizza Box/翠華...乜都齊. 起初都覺得ok, 不過近來服務每況愈下, 之前試過叫KFC, 送到上黎發現薯蓉沙律全部甩蓋, 搞到gravy同沙律醬流到成個袋都係, 就好似送外賣果位哥仔玩完過山車咁. 忍唔住打上去投訴, 點知位接電話妹妹話: 咁而家係咪要求賠番D薯蓉同沙律? 唉, 我話: 唔駛勒, 只不過希望同你地反映下可唔可以下次小心D呢? 話口未完, 另一次叫老麥更加誇!
落單時對方已講明因為訂單太多所以送遞時間需要75分鐘,(其實當時係平日下午三點) 我都覺得ok, 結果等呀等, 三點正叫, 四點四都未見影, 打上去問話早響廿分鐘前上左門口. 問題係75分鐘我等, 但而家90分鐘都黎緊都無得食就真係唔得囉. 講真上去食都無咁嬲, 我要求取消訂單, 對方又願意喎. 點知呢頭收線, 果頭位外賣哥哥又送到上黎. 唯有死死地氣無奈接受呢個又係玩完過山車既外賣, 汽水濺到成袋都係, 薯條稔晒, 個飽又四分五裂...
論外賣, 翠華外賣實在唔差. 至少做得乾乾淨淨, 老練咁遠送到黎D野食都係熱辣辣兼唔會走樣.
外賣我依舊叫, 但會提醒對方可唔可以小心D, 鬼叫自已懶....

生活炒雜碎(第十三回)

嘩! 真開心, B部HP電腦又死左, 死因: 同上次一樣, 死底板. 三個月內連死兩張底板, 真係嘩哈哈.
打上HP熱線, 職員好細心咁叫我將所有USB線除去跟住開機, 問題係之前一晚我已經試過, 都係唔成功, 所以我同佢講: 尋晚我已經試過勒. 但佢仍然好堅持要我咁做, 結果當然仍然係一樣.
咁我咪同佢講: 麻煩你睇番上次維修紀錄, 根本同今次係一樣. 咁佢check過後話因為上次維修後有三個月額外保養, 所以今次可以免費上門維修. 我同佢講: 可唔可以請師傅今次一次過帶埋底板同ram上黎好過分兩次要成兩個星期先整好. 點知佢話: 師傅會用好專業既眼光去決定.... 我真係無言.
就放長雙眼睇下今次呢部電腦又會整幾耐. 不過我都留後著以防部HP整唔到, 預備買部新desktop俾B, 不遇聯想好定Acer好呢?

生活炒雜碎(第十二回)

原本近日傷風纏身已經夠慘, (皆因公司半個部門都病左! 我都算係被傳染!) 點知尋日番到屋企, B話部電腦又壞左, 我都以為只不過普通case, 點知原來係大件事, 成部機係boot唔起. 結果周圍問人, 唯一容易搵到既係G先生, 佢都估計係motherboard問題. 但自從上次領教過HP既麻煩CS, 心諗不如搵街舖整仲有效率. 結果拎去街舖, 對方見係廠機即時撒手不幹: 不如搵番原廠啦! 結果又要等到星期一先可以搵到HP.
與此同時, B因為有事要無時無刻check email. 我唯有借出我部手機, 去附近一間茶餐廳用wi-fi上網. 可惜佢又嫌我部機個mon細, keypad難篤, 根本就check唔到email, 我就提出不如一人一電腦吧! 兩年前我都提出過, 只不過我見無乜地方, 所以作罷. 點知今次佢都同意呢點, 仲同我去"豐澤"睇機.
之前我話過, 如果再買新電腦, 希望一定有Blu-ray裝置. 所以我從呢一點出發, 可惜"豐澤"選擇不多, 心諗不如去電腦商場搵啦.
去到電腦商場, 確係比較多選擇, 不過水貨比較多. 路經某名店, 睇見SONY某型號減$2000大圓, 非常吸引, 結果經過多番思量同講價, 由原本贈品係手電變成路由器! 心諗今次真係執平貨, 番到屋企用新電腦一上網睇見SONY網頁都係呢個價! 電腦舖平$2000只係速銷手段, 不過既然屈左一部router, 再送2GB ram, 已經算係咁. 終於有得加入藍光行列, yeah!
暫時呢一刻B會共用我呢部新電腦, 希望佢又唔會整壞部機. 亦期待下星期一跟HP大鬥法!

生活炒雜碎(第十一回)

今日睇新聞真係火都黎埋, 明知全世界都注視緊北京, 點解仲會有公安亂打記者事件出現? 今晚睇Now新聞報導更加睇到所謂被踢傷既公安根本自己拉開其他記者後自己向後退跟住無厘頭烏低身向住南早記者撞過去. 呢次佢地雖然屈機成功, 但佢地既醜態將留存萬世遍佈全球, 更令今次奧運抹上污點, 所謂既文明奧運原來只係得個講字.
##############################################
今晚行超市, 原來出前一丁麵又再賬價! 加到四個九一包! 雖則特價三個九一包, 但比一年前已經足足貴左差唔多兩蚊一包! 通賬開始有D超現實.
##############################################
今日收到段爆笑新聞, 話說有媽媽帶個女去"屈銀紙", 阿女突然要漯買其中一段玩具. 阿媽驚覺果件所謂玩具其實係成人按摩棒, 阿媽向店舖投訴點解將成人玩具公然擺上架.
女性朋友C話之前響同系超市已發現有賣"震蛋", 但今次呢支棒實在又過份左少少.
我唔覺呢種成人玩意擺響"屈銀紙"賣有乜問題, 不過個包裝實在太清楚, 的確會令人幾老尷.
##############################################
唉....又生日, 又老一年, 唔知點解今次有D唔開心...

生活炒雜碎(第十回)

仲記得我地屋苑變成賓館一事嗎? 之前已講過有業主金錢掛帥事事以錢為先, 前日響屋苑討論區同其他人講同件事完全無關既答訕, 呢位業主突然向我痛罵一番, 一句: 樓價跌左邊個負責呀? 我真係目瞪口呆! 我唯有叫唔好咁自私, 只顧錢將安全不顧. 佢竟狡辯話果度人人都好睇樓價, 又話自已為屋苑出左三年力...blah blah blah... 點解而家D香港人會變成咁架? 正一垃圾!
###############################################
香港人係點? 尋日睇新聞見到排隊買紀念鈔既人龍, 六七十歲有, 一家大細抱住三個月大BB亦有. 出面風雨交加, 大家都只係為左買到紀念鈔炒賣發財(當然相信亦有一成人真心買黎紀念!). 一個末世既畫面! 尋日我都話: 閃電閃到咁都劈唔死人, 真係好神奇.
###############################################
香港人係點? 尋日響公司接到個無來電顯示既街線來電打到我既內線, 依舊一句"Hello", 或者我有太濃烈英國口音, 對方唔講野, 我再次"Hello", 大約五秒後對方收線. 一陣個電話又響起, 又係無來電顯示既街線來電, 我刻意唔接直接落voice mail, 但對方無留voice mail. 隔左一陣, 電話又響起, 又係無來電顯示既街線來電, 今次我接聽, 又一句"Hello", 對方又唔講野. 我唯有: 喂? 對方出聲: 我想搵一位女士, 係外國人, 個名唔識讀, 叫"helen la", 不如我串俾你聽.
我答: 呢度無呢個人喎. 你打幾多號電話呀? 佢就講出我既直線電話. 我話: 電話號碼啱, 但就無呢個人... 人字都未講完, 佢就收左我線. 哈! 無禮貌到咁, 果然係香港人.

生活炒雜碎(第九回)

隔左咁多日先有新blog文, 皆因部電腦煩到震.
用左兩年幾既手寫板因為俾我日日行文千字結果面版花到認唔到字, 寫一句野都搞成個字先寫到. 所以把心一橫買塊新既. 奈何手寫版牌子都係黎黎去去果兩間, 結果又買番同一牌子另一以往用過既型號. 原本想買新出既無綫型號, 但諗深一層, 一塊板只得兩三年壽命. 如果買塊三百幾蚊既無綫板好似比較唔合化算. 都係買塊百零蚊啦.
裝好手寫板, 又到另一問題. 一直用開IE上網, 亦有用Firefox做輔助. 但自從升上IE 7.0之後就發現有極大問題: 一來唔可以做Windows Update, 二來每隔一段時間, IE內所有cookies都會自動消失, 搞到每次上網去某D要login既網頁都要重新login. 但係記性有限, 真係無乜可能記住晒所有網頁既login ID, 總之搞到好麻煩. 但係一直搵唔到原因所在, 所以前兩晚把心一橫set Firefox做指定瀏覽器, 惡夢就咁開始. 個IE突然發脾氣, 所有元件都暫停, 變成一個唔肯上網既既IE. 結果我火滾之下順手將成個IE7鏟走重裝IE6, 點知原來個IE6一直在世, 只係IE7遮住左佢. 之但係發現個IE6中左毒, 俾某網站騎劫左個首頁. 電腦入面既N牌防毒軟件竟然scan完話無事, 跟住我嘗試用其他既Anti-Spyware軟件去掃都係無功而回. 唯有索性鏟走埋IE6, 點知錯手鏟走埋其他野, 就連呢十年save落既email一律走埋. 嘩! 死晒火! 好彩Win XP既一流功能: Time Machine!!! 一個唔該就將時光重回前一晚啱啱裝好手寫板既時候. 無事發生過! 不過我都順手鏟走個IE7, 今次IE6重生後完整無缺無毒運作. 不過我諗以後主力用Firefox, IE? 少掂為妙.
###############################################
今日出去食兩餐都食到我好火! 晏晝一餐去某連鎖餐廳, 兩個人叫兩個餐, 難食就預左. 食到尾聲, 我食完但B未食光, 侍應A走埋黎問我食完未, 我話食完佢就收左我隻碟, 仲跟手收埋B既刀叉添. B仲話好彩唔駛切野. 唔夠一分鐘, 侍應B走黎問食完未? 我地都未答佢已經伸手收碟. 我立刻話仲未食完喎. 佢先縮手. 不過都唔夠兩分鐘, 我地都未講夠十句野, 侍應A又問同一條問題: 食完未?又係未等答案隻碟已經係半空. 我無晒氣但又大聲話: 未食完呀唔該. 侍應A又縮手放番隻碟上檯. 話口未完輪到經理問, 我怒啤兼擰頭, 佢又先自動離開. 心諗如果再有人黎問我一定拍檯破口大罵: 你地問撚完未呀? 都未食完, 乜你好撚趕咩? B都買佢地怕拿拿臨食完. 問題係出面又無人等位兼且又有大量吉檯, 點解要搞到D客咁趕呢? 結果叫杯餐茶, 嗌左成十分鐘先出現. 真係火都黎, 一毫子貼士都唔俾!
跟住今晚去附近既茶餐廳食個快飯, 兩人每人叫左一個炒粉麵. 落單時仲話一個飲中湯一個飲凍檸茶, 點知阿姐番單仲大聲朗讀: 兩個中湯. 咪住阿姐, 係一個中湯一杯凍檸茶喎? 何來兩個中湯呀? 佢竟然話你地兩個叫既炒麵跟中湯嘛. 吓?立刻睇番佢張手寫單確係一個中湯一杯凍檸茶. 佢竟然仲話係兩個中湯喎. 真係無言, 今次我無爆粗, 只係無奈咁話我淨係要一個中湯一個凍檸茶, 唔好俾其他野我, 唔該.
點解而家所謂既服務性行業既人咁求其兼無賴既?

生活炒雜碎(第八回)

時光重回收樓之後入伙之前.
B話想搵驗樓師驗樓, 我就寧願搵人做徹底清潔. 結果最後我嬴左, 我就搵番一向幫襯開既家居服務公司幫手, 代價係一千大元一次徹底清潔. 佢地響電話向我簡介個服務: 包徹底清潔一次, 包所有清潔用品器材我地無需提供, 包清潔到底, 唔乾淨一定抹到滿意為止.
當日, 兩位大嬸已經遲大到, 講呢度距離港鐵站遠喎. 但佢地遲左35分鐘遠比距離港鐵站既10分鐘路程更遠. 到埗後問我攞清潔濟... 喂? 乜你地唔係包埋咩? 吉屋邊度有齊清潔用品呢? 好彩上手業主都有一兩枝淨低. 佢地開始時仍見好落力, 直至30分鐘後, 兩位大嬸開始馬拉松式煲手電粥, 一路單手煲粥, 另一隻手就抹窗. 另一位更加勁, 連地拖都無帶, 一路單手煲粥, 另一隻手就用布抹地, 用既係潔而亮! 一個鐘頭後, 佢地話完工要我驗收. 我見木地板俾佢地用潔而亮抹到白晒, 眼都突埋. 抽油煙機完全無抹過, 厨房牆又係變成潔而亮白色漬牆. 唯有請佢地再抹過, 佢地只係用濕布將地板上既潔而亮抹走, 抽油煙機抹完依舊油淋淋, 厨房既潔而亮牆無郁過. 兩位大嬸完全係hea左我60分鐘就話收錢, 求其到不得了.上星期我地位鐘點阿姐上黎, 我同佢講: 好彩你今日上黎, 上次你公司果兩位阿姐真係亂黎. 用潔而亮抹地!
一千蚊開一次眼界, 好大代價.
###############################################
連續兩次叫PCCW師傅上門, 兩次都拍案叫絕. 上次遲左兩個鐘, 要發火鬧先到. 今次仲好笑, 因為簽約上18M寬頻, 約左夜晚八至十上黎換modem. 點知下畫五六點位師傅打黎話: "今日下晝咁啱上你地屋苑做野, 已經順便幫你做埋, test埋速度都ok. " 吓? 乜唔係要換modem咩? 師傅話: "班CS係唔1係都叫話換modem架啦. 批modem可以行100M架!" 我再次: 吓...... ADSL 100M??
夜晚番到屋企即試速度, 18M價錢得13M用得, 仲話速度ok?
###############################################
今晚新聞真係實在太正, 志蓮監獄! 果下不準揮手, 真正前無古人後無來者, 膠到不能!

生活炒雜碎(第七回)

新年快樂. 未過年就又拍敗杖, 年三十先開始傷風結果頭重重鼻塞塞去過新年, 真係意想不到. 不過近幾年真係唔係好想過年, 只因為怕被人追......問幾時結婚派利是. 上至父母親戚下至同事朋友都總會有人問. 以往會答遲D先啦, 而家會答有機會既...
#########################################
就快收新樓了! 距離收樓日子只差兩三個星期, 雖則賣家個律師成日失蹤, 搞到佢有特別要求我地都配合唔到. 但都無損我地對呢個日子期待.
尤其係每隔一段時間上網查銀行估價, 都有驚喜. 至今, 我地都未搬入去住, 已經升左廿七萬. B話佢保守估計當我搬入去住之日應該升至四十萬.
升當然開心, 但睇番個市反而好擔心. 尋日報紙報導炒家由私人樓宇居屋炒到去公屋, 黃大仙下村一個單位竟然高價一百五十萬售出, 買家更揚言裝修後會以七千六百蚊出租. 我心諗: 係咪有問題呢? 公共房屋既設立係俾大眾有廉價房屋居住, 由幾百到幾千蚊租金絕對人人負擔得起. 但今次高價成交及高價出租係咪有D有違原意呢? 當左鄰右里都只係交緊千零二千蚊租, 而果户就交七千六百蚊租, 唔知果位租戶個感受係點?
#########################################
前日某報地產廣告上係咁寫: 過萬呎可經營宗教.
原來宗教係可以經營.

生活炒雜碎 (第六回)

過時過節梗係食食食, 大約六七年前帶過B去食一次大家樂之後, B簡直係"聞樂色變". 以後我都會響大家樂買外賣番黎, 番到屋企我都會即刻掉左膠袋同餐盒免得佢知. 結果聖誕日睇完睇都巳經成十點, 商場既茶餐廳超低能地只賣百二銀既聖誕餐, 其他食物一律欠奉.. 結果其他選擇係老麥或大家樂. 唔想聖誕都吔包, 都係揀大家樂. 餐牌上, B無樣睇得上眼, 是旦叫左個火雞餐. 火雞餐?? 三十八蚊火雞餐? 我就穩陣D叫個干炒牛河. 即叫即炒, 等左好耐. 一上檯, 原來係火雞扒餐有意粉有雜菜, 睇落都唔差. 但我個干炒牛河... 水汪汪比濕炒更水汪汪, 直頭似係瑞士汁炆牛河. 兼且甜到好似食緊糖咁, 真係好難受.
以為佢會更怕呢類中式快餐. 點知前幾日唔知點解佢話不如去食大快活. 嘩! 大快活算係史上最難食既快餐廳. 我即刻話不如去打邊爐啦. 但係呢幾日凍到抽筋, 要搵位真係有難度. 行過美心MX見到佢地都有火煱兼且有大把位. 結果我地決定一試, 原本佢都打定輸數, 但最後佢又覺得幾得意, 尤其有"真火"暖住佢, 確係加左唔少分. 第二晚已經話又要去食過!
##############################################
當然第二晚無真係又去美心打邊爐. 因為為左去黃埔睇傢俬兼可以去食佢既至愛"鼎泰豐". 佢巳經千叮萬囑要我打去訂位, 我亦訂左. 因為行傢俬舖真係幾花時間, 巳經打去"鼎泰豐"話我地要遲D到, 對方亦都話無問題. 行完之後就立即衝上"鼎泰豐", 點知去到門口... 咦? 變左第二間酒樓既? "鼎泰豐"呢? 再打個電話去問... 原來佢地巳經搬左去灣仔兼且改左名! 即係"鼎泰豐"撤離香港? 唉. 黃埔美食坊一樓入面永遠有幾個死舖位, 無論做乜野開乜野, 永遠最後都係死路一條聽執.
但無得好揀之下揀左其中一間無乜客既死舖, 呢一期佢地係賣海南雞飯兼售泰菜. 可惜海南雞又貴又麻麻, 叫左個菜同湯都係一樣難食得可怕, 就連油飯都可變成油加落飯就算, 十蚊兩啖都算經典. 兩餸一湯收我二百七, 真係多謝晒唔該. 早執早著. (食完番屋企仲要即刻"拉肚子"排左一夜一朝毒. 真係咪再搞我!)
##############################################
時間又番去聖誕日, 是日晏晝去左觀塘既傢俬倉行下. 行完去左apm食下午茶自助餐. 五十八蚊一位有湯有pasta有pizza又有各式熱盤仲有甜品蛋榚仲包杯"蒸"添! 真係幾抵. 不過既然價錢咁抵又撞正假期, 一定一家大細出動既時候. 我地坐正甜品附近就目睹一次恐佈襲擊. 話說侍應捧出一盤芒果布甸, 有一兩位太太已經立刻上前筆左少少, 當時個布甸都仲係一個圓型只係少左細細兩忽. 跟住兩個小女孩就圍住個布甸, 我仲諗住等佢地筆完先起身去筆. 點知睇住當兩個女孩行開左後, 成個布甸唔見左. 只淨底一片片好似豆腐花形狀既布甸打平瞓響碟面, 最重要我發現果兩個女孩根本無拎碟去筆, 兩手空空就番埋位. 可憐既布甸突然俾人肢解後但無送上碟就咁被棄屍檯面, 有幾個客有去望望, 都只係望望就空手回頭.
我覺得家教真係好重要, 無論係屋內屋外都要好好管教同社交禮儀都要有一定既認知. 並唔係由得佢地自由發揮跟住拋一句: 細路仔係咁勒啦, 你未做過細路仔咩? Sorry, 我好有家教架. 大人唔教, 細路咪有壞學壞囉.
以下係我兩三年前一次經歷: 有次響銅鑼灣某名食店食自助餐, 親眼目睹一位小朋友去筆雪榚但唔小心跌左個雪榚球落地. 佢似係好情急之下, 用個雪榚匙羹響地面筆起個雪榚球跟住放番落雪榚櫃. 跟住有個男人似係識呢位小朋友同佢講左兩句後, 跟住個男人就去筆左雪糕番埋位.
直到我埋單後, 回頭一望先至知個男人係位小朋友既老豆. 唔知杯雪榚好唔好味呢?

生活炒雜碎 (第五回)

因為B想買意粉醬, 百佳既貨色已經頂唔順, 但又唔想老遠去City Super買. 結果帶佢去九龍灣既Market Place by Jansons. 開左咁耐都未去過, 諗住會好大好多野買, 點知...
仲細過屋企附近間惠康. 就算另類高貴貨品都唔係太多, 反而普通貨品既價錢就比其他舖頭而貴. 作為惠康成員之一, 完全繼承惠康既傳统又迫又窄又多人. 行兩行已經想走.
不過好彩B都搵到佢想要既意粉醬. 並且搵到D佢以為香港無得賣既"辣根鹽", 正當佢再搵到"火雞子醬"時, 蓋頂個日子吸引到我! 尋日係十一月四日. 而果樽野既"有效食用日期"係十月十八日! 而且樽野仲鋪晒塵, 明顯都好耐無人掂過. 嘩! 果然有惠康既風範, 過左成兩個星期仲響架上. 咁岩有位職員哥仔行過, 我暗串(大聲)問: 請問呢樽有無新架? 因為果度樽樽都過晒期. 哥仔喪道歉, 急急將十幾樽醬飛落手推車. 好彩佢地仲有另一個牌子選擇, 不過大家佢果度買野, 真係要睇清楚個有效食用日期. 如果今晚我唔出聲, 分分鐘連Thanks Giving都過埋, 呢堆過期"火雞子醬"仍然會響架上.
#############################################
同B去銀行幫佢既簿仔戶口昇格到綜合理財戶口. 原本佢都唔想轉, 但一聽到有特惠利息, 兼免年費. 所以一試.
就響銀行入面等緊既時候, 大家講起業主會唔會明年加租. 我堅定話一定會! 因為我地係交緊市值以下既租金. 呢個屋苑過去既半年樓價同租金都狂升. 同一面積單位, 租金一年前同而家竟然相差二千蚊, 而且仲係供不應求. 我地非常擔心業主真係會瘋狂加租, 雖則嫌貴可以租第二度. 但係我地兩個都好鍾意呢個屋苑. B話如果真係加咁多租, 不如買左佢啦! 我話: 但係... 你又話唔想問銀行借想一炮過? 佢話: 如果有需要都無辦法架. 後黎大家一計, 七成按揭, 都已經用左九成積蓄. 諗落好似唔係太好.
當經濟好時, 並唔係人人受惠.

生活炒雜碎(第四回)

爛gag一個:
有位懶音mk女去打診所打流感針, 入到診所佢同護士講: 鵝泥打流緊真. 護士定一定神就問: 係咪打流感針呀? mk女點頭. 護士再問: 你叫乜野名? 睇過未? mk女: 流緊真呀. 護土又定一定神就話: 知勒, 你係黎打流感針, 咁你叫乜野名呢? mk女再講: 流緊真. 護士唯有問佢拎個身份證睇.
mk女個名係叫"劉錦珍".
#############################################
BBC三個新台終於登陸到"現在電視". 其實其中有兩個台既節目係同"現在電視"上面既"發現頻道組合"係有相當程度既重覆. 分別只係"發現頻道"既節目有中文字幕同雙聲道廣播, BBC既就一律英文對白無字幕. "現在電視"用"BBC 5"組合去宣傳呢5個BBC台. 之不過呢三個新台興趣不大, 連BBC Entertainment因為無乜新野都少睇左. 不過, 近日佢地出teaser話"The Graham Norton Show"會就快有得睇. 對佢真係無乜好感, 再睇舊年佢客串"Another gay movie"入面飾演大周SM男極之嘔心. 真係避得就避.
#############################################
呢排部手電真係問題多多, 食電已經係家常菜, 無用wi-fi無開BT無用黎聽歌都可以要兩日叉一叉. 再加每次聽完電話後一收線就會發生"達達"聲, 好似行人過路線既盲人輔助器一樣, 真係好煩. 心郁郁又想換電話. 用慣左PDA手電, 又可以手寫中文, 當然想繼續用番. 但係幾個牌子都幾貴, 五六千蚊先有交易. 唯一叫平係"索愛"既P1i, 但都要四千幾.
#############################################
唉~ 抽水季節! 選立法會議員變得似選班長行長. 阿豬阿狗有無案底既齊齊抽水搏上鏡出位. 邊個係真心真係有眼睇.
#############################################
今日同B入戲院睇"Amazing Grace"(港譯:奇異恩典), 以為呢間"教會"電影公司既製作會好說教. 但係整部戲都好好, 故事甚至演員演出都中上水準. Michael Apted導演果然寶刀未老!

生活炒雜碎 (第三回)

輪流轉, B傷風完就輪到我. 我病完B又感冒, 今次仲要大感冒, 睇左兩次醫生. 今日先好番少少. 呢個幾星期, 要日日照顧佢起居飲食. 叫佢食藥又要求又要請三請四催, 佢先可以乖乖食藥. 結果, 佢未散, 我就已經散晒.

############################################

除左"光污染", "聲音污染"都係另一種俾人忽視既問題. 尤其我地每日去餐廳茶樓都受到呢類污染. 汚染通常主要唔係來自食客, 反而係來自侍應.

話說樓下個商場開左間我好鍾意既越南河粉店, 有晚同B走去幫襯. 一開始就已經搞到好嬲, 因為太多人, 所以要攞飛. 但我問門口果位知客攞飛, 但佢無理我, 我以為佢忙點人數無留意我. 所以我再出聲示意, 但佢一樣望一望我就算. 呢個時候亦有其他人加入攞飛, 佢竟然好順手派飛俾其他幾位完全無理我. 正當我想拍檯之際, 經理一個閃身出現, 遞左飛俾我. 心諗: 點解八婆都可以做知客既?

跟住等左一排就有檯, 反而另一家人, 一家六口竟然被分配去四人檯, 結果人迫人.

全晚高潮係成間舖頭D女侍應都好好中氣, 全晚乜都大聲嗌. 點菜? 嗌! 帶位? 嗌! 最慘係全程響你耳仔邊不停嗌. 有兩次真係俾佢地嚇到彈起! 又嘈又迫, 就算D生牛肉河有幾好食都食唔落. B直頭食左半碗都話想走, 試過其他分店又無呢個問題, 只係呢間分店真係嘈到想死.

臨尾埋單同位經理講: 你地班女好嘈! 可唔可以叫佢地唔好嗌呢? 嘈到都唔想食落去. 經理猛say sorry.

根據屋苑討論區既街坊講, 呢幾日佢地去幫襯時, 已經靜左好多, 無再嗌生晒. 原來真係唔鬧唔得!

#############################################

再次證實以下道理:

外籍靚男人一定配個好醜樣既中國女仔.

一位好靚既外籍美女一定搭上一個好醜樣既港男.

呵呵!

#############################################

消防船噴水表演加送彩虹

白色大洞

有時搭lift時, 當部lift好多人時, 我都會通常視線會向層數錶版去. 但公司外國人多, 佢地又高頭大馬, 有時都會遮住我呢位六呎人士既視線. 背脊唔好望, 屁股更加望唔落(除非靚果隻啦!). 但今日搭lift時我竟然俾個男人屁股吸引住. 呢位同事著住淺色西褲, 原本我都係唔想多望, 但眼角一射, 佢條褲有D野...
再望真, 原來西褲皮帶扣位釘住一條洗衣店既號碼藍色紙帶. 藍色帶放上淺色褲份外奪目. 呢種大意有時真係唔可原諒. 雖則洗乾淨, 但著之前都會檢查下有無穿窿有無爛卦? 唔睇清楚就著就好似買件新衫唔洗兼唔撕貼響衫上既呎碼膠貼就著出街, 呢D真係自己攞黎衰.
我有諗過提醒個同事, 但一出lift決定唔出聲. 怕同事誤會我咁留意佢個肥屁股. 正如之前多次響街或食肆驚見有男人"火車未到站". 就好似前兩日正等緊外賣飯盒, 前面有位好樣中年男人同幾位女同事等位. 中年男人突然跌野, 佢一俯身, 嘩! 太陽出來了. 一大個白色大洞向我張開. 真係誇到哩... 正盤算既應唔應該上前提醒佢, 當時身懷職員證, 如果我一提出, 生怕佢會話: 乜乜公司咁多基佬周街望人下面. 與此同時, 佢地已入座, 呢位男人一就座, 個白色大洞又向大家招手!
所以各位男生, 出門前或去完廁所, 請check下你自己條褲. 避免悲劇重演.

生活炒雜碎 (第二回)

唔知係身體唔好, 定抑或真係老左(就快又大一歲~ 唉!), 呢個星期放工後一番到屋企食完飯洗完碗, 同B排排坐睇電視, 唔駛15分鐘就自動訓著. 仲要係扯晒鼻鼾果隻, 次次都要B半拉半扯推我上床訓. 好訓係好事, 但好訓成咁又會唔會係有病呢? 而家真正酣睡八小時, 無多無少.

#####################################

前兩日, 同事A提議落筲箕灣食晏, 一呼百應下包左半架小巴落去. 今次唔係幫襯"安利", 係幫襯另一間都算出名既麵檔"王林記". 佢地出名又係切腩同手打魚蛋. 我就叫左"魚片頭切腩撈粗".

一上枱, 一碟深啡色粗麵加幾塊切腩再加一碗魚湯片頭. 賣相一般, 味道都係一般. 隔離"安利"反而仲好少少. 另同事再叫左碟"豬手", 呢個真係全日highlight! 好味道到飛起~ 相都影唔切就挾晒!
間野超多人等位, 坐得超迫. 飯市可能要久候. 心諗附近有兩大報社:成報+星島, 一定有夜市做, 點知原來夜晚收八點, 無得宵夜!
點去? 地鐵筲箕灣站東大街出口出左轉行兩分鐘. 安利斜對面.

買鞋記 aka 12號腳買11號鞋

第一次買Columbia呢個牌子既戶外鞋係五年前, B送左對鞋俾我. 難得果時響"馬拉松"仲可以搵到12號(美國碼)鞋! 一著就五年. 亦有兩年前開始成為佢地既fans, 開始轉用佢地既產品. 除左便服鞋, 始終係Rockport係十幾年以黎唯一既選擇.

五年後既一日, 因為落雨發現對鞋入水先至知對鞋底穿左. 畢竟都五年, 呢個牌子已經好耐用, 但始終爛左都要換過對. 所以就走番去"馬拉松"買番呢個牌子既鞋. 但行過好幾間太古既連鎖體育用品連鎖店, 佢地都話最大只有11號. 走去兩間Columbia專門店亦都係相同答案. 結果忍唔住真係打去問太古... 原來真係無再入12號鞋!

我真係笑左出黎. 原來香港係得我呢對12號大腳會響本地買Columbia鞋. B提議上網買, 但要老練咁遠去到英國網訂, 每對七百幾蚊未計郵費. 之但係, 我真係未試過網上買鞋, 寄錯size顏色甚至款式點算呢? 真係膽搏膽!

就響呢個時候, 我不經意咁拎起對Rockport睇, 咦? 11號鞋?? 既然11號皮鞋都算做舒服, 咁11號"波鞋"都可能會一樣卦. 結果決定去試一試11號鞋.

又再問幾間"馬拉松", 今趟佢地話11號鞋都賣晒! 天呀!!! 真係咁黑仔?? 走去專門店, 竟然佢地有一千零兩對!! 嘗試試一個較硬既款式, 11號真係好細, 好窄好唔舒服. 正想放棄時, 店員問不如試埋另一款較軟. 一試之下, 呢個都可以接受, 當然無12號咁自由奔放. 但作為一般行街都可以接受, 自知唔多運動, 所以真係唔會多想. 結果....買下呢對. (我買既係紅色, 橙色太橙. 好難頂!)

我估我對腳都唔會再長(發)大卦.

生活炒雜碎 (第一回)

B問我點解成日我地去既地方通常都係得佢一個係外國人, 究竟香港D外國人去晒邊? 一條睇落好易答但又好深既問題. 易答係一般居港外國人都係出入中環灣仔淺水灣赤柱一帶, 要過海真係甚難. 記得以前識得有位居港外國人(仲要係本地出世添!), 原來佢己經好耐無過海去九龍行, 只係出國時被迫要過海到機場. 可惜我同B甚少出入果D地方, 尤其B搬離中區後跟我到北角甚至而家入到新界住. 更加少去. 出入場所離不開翠華美心太興花園吉野家, 確係幾難遇上有外國人幫襯. IKEA HMV GOD Page One City Super或者會好D. 我又咁諗, 其實人在異鄉, 始終見番同國人會係對思鄉有D幫助呢? 記得當年初到利物浦J帶我去當地唐人街一行, 可惜當時利物浦唐人街相當蕭滌, 十室九空, 得幾間店舖酒家同一間華人經營超級市場營業. 街上都好少華人, 相對倫敦果條唐人街繁盛有好大對比. 自始無再行去果頭. 後來兩年後我自己又行去唐人街, 一樣無變, 一D親切感都無, 思鄉或者有少少如想知星島明週壹仔頭條係乜呢? 但其他就好難對思鄉呢家野有幫助. 我明白B既感受, 但係夾硬去思鄉治療只會令自己更思鄉. 適當地補遺, 如咬住Donut睇late show with david letterman或者等佢放自己假約佢班外籍朋友去街食飯. 或會令佢開心下.

#####################################

去IKEA最怕失禮, 尤其本地市區兩間IKEA, 多人行到唔恨. 點知今日我就真係好失禮.

話說同B行到安樂椅部份, B話張椅一望就知唔舒服, 我叫佢坐上去試試. 佢點都唔肯, 結果我一屁股坐落去時, 張椅突然向前翻, 我就連張椅墊跌落地下, 雙脚向上成個V字咁. 最慘當時好鬼多人響前面, 個個O哂咀. 好辛苦B先拉番我起身, 真係走都走唔切. 唔知幾時youtube又會有段片叫"宜家傻佬試椅".

#####################################

環球復黑王又有新碟出, 今回入左呢四隻:

關正傑仲爭虛竹傳奇同大地恩情就儲齊寶記一套! 可惜康藝成音未有重出84/85兩隻碟, 否則可以儲成關正傑全集. 鄺美雲最好聽既就係呢隻"留住春天", 開始大紅亦有呢隻碟開始. 至於Auntie Yip呢..雖則有齊黑白時代既歌, 但係都忍唔住買隻復黑(刻)黎儲.