2007年7月31日

停一停諗一諗

連日皇后碼頭既新聞, 真係可以話打個大"喊露".
皇后碼頭要被清拆, 確係好可惜. 當時我確係反對清拆. 但後黎政府讓步, 願意先拆件後重置. 呢個方案就容易接受.
但唔知點解仲有班民主暴民, 仍借集體回憶呢個悶到爆既話題, 借勢反抗. 當然有抽水既議員亦有目的既人同為出名而出名既無名小卒加入, 事情變得唔理性. 究竟佢地有無諗過將來呢? 定只為一己私慾呢?
假設, 法庭決定唔俾政府拆皇后碼頭, 當然可喜可賀. 之但係咁代表唔可以進行填海工程. 即係話就算未來機鐵隧道同公路都改道而建, 皇后碼頭就變成公路側邊一個大涼亭. 以往可以吹吹海風望望海就會變成車來車往噴到一面塵, 你仲會去皇后碼頭坐嗎?
唔該大家停一停諗一諗, 唔好盲從附和. 一味只識抗議, 從另一個角度去諗, 兼且諗長遠D, 就會發現其實要做要諗要計劃既唔係咁簡單只識一味所謂"保育". 仲有好多野要去做.
都希望政府尊守承諾將皇后碼頭拆件重置到合適地方. 因為上次既錯誤已經做成好大既傷害, 一錯再錯只會令社會更分化.
我亦替已拆走既啟德機場可惜, 點解當年大家只識送別而無人保衛呢?

2007年7月30日

大鄉里出城: Jimmy's kitchen

作為壽星仔, 當然expect有人計劃下為我慶祝. 點知B仍然問: 咁你想去邊度慶祝呢? 我雙眼一厲, 佢就話: 咁我諗到去邊... 皆因上月佢同佢D friend去左間好有名既西餐廳, 佢話好味到好難形容兼且終於再嘗"檸檬批"既真正味道. 所以决定帶我去多次.

講真我地呢兩個"村姑"(尤其係我)好少出咁大場面. 上所謂西餐廳, 多數都係"豉油西餐", 十間著左九間難食. 唯一一間港式西餐佢認為好食係: 花園餐廳. 因為佢覺得佢地既牛扒係唯一可以吞到落肚, 其他都係咪搞.
響網上有人話Jimmy's Kitchen都係"豉油西餐", 雖然我未去過, 但我相信呢間有成八十年歷史既餐廳, 唔會搞呢家野.
餐廳響中環一幢商業大廈既地舖, 要由大廈入口進入, 位置好奇怪. 但一入到去, 一陣爆屎渠味. 嘩! 我極之怕呢隻味, 通常我會轉頭走. 但今晚我係主角, 頂硬上.
B一早訂左檯, 待應帶我地埋去張檯, 待應仲幫我拉椅, 服務好好. 打開menu, 全部英文, 唔緊要, 菜名側邊有講究竟係乜野黎. 只見成本menu, 除左魚之外(我唔食魚)樣樣都好似好好味喎. 極難決擇.
結果我地揀左頭盤有牛尾湯加凱撒沙律. 主菜就點左Prime Rib同Chicken Kiev再加甜品係檸檬批同火燄炸雪榚.
牛尾湯同沙律都好好味, 尤其牛尾湯好濃, 好正.
B既prime rib賣相好好, 味道都唔錯. 至於我既Chicken Kiev就似中國小籠包, 雞肉瀼滿湯汁, 一切開雞肉立刻爆汁. 味道就幾一般.

B既檸檬批真係好味到我都唔識形容, 哈! 遲D佢番西環, 分分鐘日日碌落去食番客檸檬批先掂!我果個火燄炸雪榚巨型到無朋友, 之前主菜加前菜已有九成飽, 呢個火燄炸雪榚真係食唔落, 就算有幾好味. 切記個分量一定係兩人向!
我地兩個飽到唔識郁, 埋單七百蚊. 呢間野環境一流, 絕對係拍拖溝仔溝女既勝地. 顧客都係外籍為主, 亦見到有名人.(某郭氏兄弟一家坐響我地後面) 呢個價錢再加食物同環境(除左陣臭味, 為D"師傅"作下法搞搞)都值得一試. 尤其我地呢D住左香港幾十年, 連呢間咁出名既餐廳都未試過, 真係有D面紅.

2007年7月29日

連阿伯都NDS

十幾年前既Game Boy攻佔大人細路既雙手同時間. 記得當年買左一部俾老媽子後, 佢極之尋迷得唔可以自拔. 可以一日玩足十個鐘, 連飯都唔記得煮, 甚至玩到機都壞埋要買過另一部.

今日老任再次進攻: NDS! 一卡地鐵分分鐘可以搵到十幾部NDS. 行街又打食飯又打. 連PSP都俾佢搶盡風頭. 再次證明: 香港人除左要有D野寄托下之外, 仲係極之倚賴"老翻"去生存. 如果有日真係無晒老翻, 香港可能會死好多人. 係好多好多.

2007年7月28日

變形香江

六年前惡搞組合: Aunties 揚名網上, 嚇得九餅女散埋! 變成餅碎.
六年後今日, 幕後既Umovies再次惡搞, 將絕世天劫cross over變形金剛, 有齊電腦特技有扒男扒女.
真惡搞.

同場加映: Aunties 成名作: 心急人上

2007年7月27日

中古物出土: Black Box

番阿媽食飯真係多驚喜!
慣左食完飯就睇下報紙. 尋晚突然心血內潮, 想搵下劉美君既CD. 話說三年前搬出黎住, 只帶走維數幾百隻CD, 仲有幾百隻留響阿媽屋企. 有畤想聽某隻CD, 真係要特登去阿媽度搵.
結果搵搵下, 搵到第二隻我以為已經俾我收埋床下底唔知邊度既CD. 原來一直被收埋響"層層叠"CD櫃入面. 尋晚終俾我"出土"!無錯! 就係呢隻"黑盒"既"三個願望"EP! 1996年滾石發行. 記得呢隻CD我只播過十次之內. 唔係隻碟唔好聽, 只係當時習慣將CD錄落盒帶用walkman聽. 響屋企又好少"焚"機, 所以我D CD特別"新淨". (不過呢隻係紙封套, 經過十一年無可避免外表有D殘)
我好欣賞當年滾石, 一直有推廣獨立音樂. 就算黑盒唔係自家製作, 但都願意拍MV.
"黑盒"既"尋找黑盒"同"三個願望".

2007年7月26日

37

一個大清早就睇見新聞話有13歲女孩未成年/未婚產子. 但因經手人係住響內地既內地人, 所以唔可以落案. 心諗13歲啊! 就己經初為人母, 連照顧自己都未識, 生活經驗又唔足夠, 未來點面對自己個仔呢?
下晝收到消息話九龍皇帝駕崩, 80有6. 相當震驚. 話晒當年都同佢有一面之緣, 而且佢既墨寶已經係香港文化之一. 佢既離世絕對係對本地文化一次衝激: 又會玩集體回憶.
番阿媽度食飯, 除左有得睇好鬼無聊既強劍之外, 有時仲會有驚人消息既公佈: 住響內地嫲嫲上週末過身. 震驚確震驚, 一來事隔成五日後先講俾我知, 二來仲出埋殯搞掂晒. 雖則我同嫲嫲相當疏離, 由20幾年前我第一次見佢至上一次見佢, 佢對我既態度都係麻麻, 有D睇唔起我既態度. 再加上分隔兩地, 佢既離世對我既衝激遠低於婆婆兩年前過世. 今晚, 我只低頭不語.
生日快樂.

2007年7月25日

九龍皇帝駕崩!!

RIP
有「九龍皇帝」之稱的曾灶財,十日前因心臟病病逝,享年86歲;曾灶財在公共設施塗鴉而獲市民熟悉,他的毛筆作品近年獲藝術愛好者收藏,亦有成衣商印製成T恤出售,在04年一間大型賣行拍賣他一幅作品,以五萬五千元成交。認識曾灶財超過十五年的作家劉健威說,稍後會為曾灶財舉辦展覽;他憶述曾灶財曾表示,自己身份卑微,作品受到歡迎感到很高興。
http://pshweb02.881903.com/apps/news/html/news/20070725/2007072519263571800.htm

伸延閱讀: 原來皇帝已經駕崩

為藍天打氣

廖局長雖然走左, 佢既藍天行動仲係繼續. 亦希望未來日子, 繼續係窗外有藍天!

齊齊影低你既藍天啦!

2007年7月24日

迫上斷背山

三個月前我曾經介紹過既新片, 終有中文譯名. 打個照面, 心中兩笑. 一笑乜呢間發行公司懶到咁, 物資循還再用, 去過斷背山都唔夠, 重要"被迫"上多次. 二笑原來斷背山已成為一般直人認為既指定"基地". 分分鐘取代左PP或各大漁塘.

再者, 呢套戲所謂既"被迫"都只不過係兩個貪心既直人為左逃稅先諗出呢條屎橋: 假扮基真結婚. 照咁睇, 一D被迫既意識都無. 因為大可以就咁搵個女人結婚一樣可以分擔, 無需為左少少著數連基佬既少數權益都要埋. 當然作為主流扮基片, 一定要please左一班直(或假定直)既觀眾. 先再照顧少數.

但響現實, 有幾多直人會願意為左少少著數"被迫"上呢個山行行走走, 冒著俾人電既危險呢? 當然呢個真係少中又少, 一定仲少過有衣櫃基被迫響報紙訪問頭一句仲話我唔係基, 下一句已經係鍾意都係鍾意佢阿哥之類既說話.
再者"迫上"確係有雙重意思: 除左被迫外, 迫上亦可解作好擠迫, 就似清明重陽, 滿山孝子齊迫上山, 兼附出親情友情或愛情, 係咪上斷背山都一樣動人.

2007年7月23日

試片室: Hairspray 戀愛大爆髮

重拍啊重拍, 荷里活乾塘中除左番炒重拍外語片, 兼且向近代經典埋手.
呢套改編自80年代John Waters 經典, 佢唯一一套PG級電影: Hairspray. 一班年青人為理想跳跳跳. 今回重拍陣容更誇:John Travolta Michelle Pfeiffer Christopher Walken Queen Latifah 甚至乎舊版主角Jerry Stiller都響新版再度獻身.

齋睇trailer都巳經見到全片camp到震, 究竟係咪只有基佬先可以拍得出咁搞野色彩續紛歌舞片?


話外音: 原來TCM七月首播80年代camp到震"Pee-Wee's Big Adventure", 一部令小朋友尖叫令大人反眼既cult片. 知人口面不知心, 呢部真係要家長指引. 再者TCM咁快就播80年代中期既製作, 確係幾classic.

2007年7月22日

奸爸DVD

I Love U Boyz作為一個搞笑組合, 佢地既電台節目甚至引申到電視既整人節目都好成功. 但似乎變成舞台或影像又好似真係唔多work. "龍兄鳳弟"已經係個失敗既例子. (當然娜娜耐耐係唯一全碟最精彩既地方!) 之後"I luv 電視台"既電台版本確係好有心機, 但係變成影像版變得太無聊, 太去認真搞gag, 無左電台果種不經意既爆肚. 劇場版更糟, 完全變成左另一回事, 或者果位好作狀既王姓作家真係唔識寫搞笑野. 到今日, "I Luv 電視台"出第二集, 更加去到東京拍. 以佢地既潮流觸覺, 日本應該可以好好玩. 但係出黎完全係兩回事. 都係果點: 太認真去營造gag位.

呢隻碟, 當然搵唔到電台版既勤日乾社論或者K100既王鳳女士. 變成佢地兩個既"假紀錄片", 講佢地為拍呢隻DVD, 搵贊助搵crew, 更俾王友良呃左. 聽落去係好新鮮, 但可惜拍得好悶. 完全無追落去既意慾. 甚至乎翻炒上集既"向XX出發", 又係對住鏡頭講一大堆無謂野, 今次甚至扮缺裂, 可惜內容完全唔覺有荒謬同喜劇感. 不過今次"娜娜耐耐"既出現的確加番少少分. 仲有果part Kawaii超人響街對住日本人唱廣東歌, 難得日本人好玩得又肯拍手甚至連BB嚇到喊, 父母都唔介意. 確實幾好玩.
雖然佢地話可能去美國拍第三集, 但如果仍然係咁既方向去拍, 相信結果都係一樣.
悶.

2007年7月21日

變態書展2007

記得上屆我仲話書展好變態, 咁尋晚諗住可以避開周末人羣同哈利迷, 所以揀響星期五晚入場. 點知人一樣咁多, 今年大會將人龍移入會展入面排隊但不幸外面人龍依舊, 確係好心做壞事. 但好彩我地老早響便利店買定飛, 可以避開羅湖式蛇餅人龍.
今年會場賣既野終於back to basic, 主要係書為主, 賣精品文具反而好零丁. 但似乎参展出版商既數量係少左, 但攤位就好幾倍. 往年好熱閙既尚書房, 可能簡體書熱潮冷卻兼人仔升左, 今年攤位迷你左兼再無搶書情況出現.
但係始終人太多, 根本無機會埋去睇本書. 就算有機會入到攤位, 但攤位入面太迫, 都會俾人迫黎迫去, 根本無可能認真去睇本書. 雖然係咁, 我地響短短四個鐘入面買左十零本書同碟. 由散文小說文學研究到狗仔旅行書再到字典同影集. 收鑊唔錯.
上屆就話有兩大類型奇人, 今年就唔覺有. 就算"書喼黨", 往年佢地唔碌爆你隻腳唔罷休, 今年我都係被碌一次, 未至於爆. 就連佛教攤位都無再點壇香, 似乎今年大家禮貌上都有改善, 可喜可賀.
不過始終頂唔順大會既排隊安排, 完全錯晒, 令人行左好多寃枉路亦令人龍塞佳. 再者唔該下次搵個識講"純正"廣東話既"食蕉"嗌咪, 因為我地真係聽唔明佢不斷重覆果句: 茅飛含休邊, 休飛含jor邊.

2007年7月20日

檸檬紅茶

日日我都會飲一枝道地綠茶, 就算我唔係劉華fans, 但深信飲綠茶係好過飲汽水或咖啡, 就算道地果D唔係真係綠茶...

尋日食完晏行過日本超市, 想買枝道地. 點知日本超市果然好日本, 只賣日本野, 台灣道地? 無喎.
結果千揀萬揀之下買左呢枝麒麟茶, 番到公司先至知其實係檸檬紅茶. 樽裝檸檬紅茶好少會好飲, 多數都極之難飲, 尤其果隻叫康師傅. 至於呢隻日本茶, 味道比較清淡, 淡到連檸檬味都無.
做左一日出牆紅杏, 聽日都係番去劉華身邊好勒!

2007年7月19日

夠與絕

作為新聞人物, 俾人追訪確係無可厚非. 但作為"正统"新聞工作者, 都要衡量輕重. 今日兩張報章"星島""東方"又再做兄弟, A1版變做G1版, 過氣人物Coco大爆名人性史. 更揚言: "所以當風聲無咁緊, 我一定會再返香港, 目標就係做全港最紅媽媽生!" 好大既口氣啊!!! 明知會觸犯法例都要做! 更勁既係記者原文照錄無再作平衡, 話俾人知雙程證來港工作係犯法.
既然俾呢兩份報紙捧左佢做一個星期新聞女皇我覺得已經足夠. 佢又唔係三頭六臂, 只係一位令到處長下台既北姑. 有乜野講, 一個星期七日乜都講晒啦. 仲有乜野可以吸引讀者呢? 其中星島尤其熱心, 簡直日日追擊. 作為一份入得學校同屋企既報紙, 日日都有段咁既新聞, D小朋友會唔會問阿媽: 點解呢個姨姨日日都著咁少布既? 佢D手手腳腳係咪有問題, 可以咁扭曲既?
而且今次佢好高調擺明我會再犯案, 尤如對法律示威. 當局會唔會或應唔應該介入呢件事去調查呢? A1係用黎報導重大新聞, 一位北姑雄霸A1幾日並發佈錯誤訊息同嘔電pose既艷照, 完全係代表本地新聞界既水準破產. 當然我對呢兩份報紙早已放棄, 佢地D虛偽作風, 聞者作嘔.

夠就夠! 但都唔夠呢個絕.
亞視有新老板後終於有所動作! 今個星期六無線有香港小姐競選. 亞視往年都會製作一個大show或其他選舉去對撼. 但今年用最平方法去對撼: 播電影! 播一套由邵氏製作周星馳主演既港產片"回魂夜". 呢套戲較早前先至重出修復版DVD. 有趣係今次亞視竟然用一套邵氏電影對撼同樣係邵氏旗下既無線. 相當諷刺! 今次應該可以吸引大班年青觀眾去睇亞視. 一來套戲已經好多年無響"免費"電視頻道上播, 一定吸引班"星迷"重溫, 二來港姐一年比一年吸引力下降, 今年甚至完全無noise, 點吸引D觀眾去睇呢? 亞視今回用對台既彈藥打番對台, 成本同回報絕對成正比! 絕頂聰明.

2007年7月18日

勿在書展前入書店

都話呢幾日無喱精神, 做野完全提唔起勁, 就連諗食晏都諗左九個字. 就響呢個45分鐘內周圍行搵靈感...去邊度食飯好之際, 唔小心! 係好唔小心入左商務. 我一直有格言: 就係書展前入書店係個好危險既動作. 因為如果一時衝動, 一定會買書, 就算明知書展有八折, 呢幾日都唔會等. 可以先睹為快. 結果今次真係發生左!邁克新書"坦白說, 親愛的"出左勒! 佢既書永遠係唔駛諗就可以肯定拎佢俾錢走! 結果可以快過書展半日讀到本書. 呢本書大部份文章都係出自佢響蘋果日報專欄. 自從幾年前搬出黎住後, 我就好少買報紙, 寧願上網睇. 但網上睇報紙, 好少會睇專欄. 因為始終網上閱讀文章既方向一向無變, 太多字始終係有障礙. 所以我都寧願有個hard copy, 睇本書好過.

不過好相信, 今年書展仍然會大出血. 買過唔停!

2007年7月17日

BBC電台廣告

呢兩日唔想做野唔想諗野唔想寫野, 番工都話可以聽Chris Moyles show解悶. 但星期日真係淨識得上網打低B online game, 同上youtube揾片睇.
腦閉塞.
不如睇下BBC拍得好正既電台廣告啦!

同場加映: Roy Walker響Carpark Catchphrase既笑話一則, 好鬼好笑.

2007年7月14日

Pixel Toy - O-OH!

利益申報: 我係第一次買Pixel Toy既CD. 以往只係從電台聽到佢既歌.
今回一隻"O-Oh!"派上台確係搶耳歌, 歌詞意淫大膽十足, 當然無當代經典"波斯貓"咁高境界, 但仍然係隻好好玩既作品.
全碟十隻歌, 兩隻改編. 但最好玩既偏就係呢兩隻改編歌. "夏春秋"就直頭用左六合彩既theme song, 充滿對人生既希望, 四十幾個數字加位夏春秋就可以令人可以忘掉煩惱. "Love will tear us apart", 一望個名好熟口面. 再望作曲... 咦? 唔係卦? 重唱Joy Division既歌? 就聽下有乜符fit! 原來玩得好狂好放. Joy Division果D就叫post punk, Pixel Toy呢個版本可唔可以叫"post 大戲"呢?
其他歌就算唔係玩野但都可以再三回味. 有七步成詩既"七言", 有令我好感動既"某一種甜蜜", 舊既唔去新既點黎"陌生人".
第一次以全碟去接觸"Pixel Toy", 感覺良好. 或者會繼續支持. 亦多謝東亞唱片願意發行呢D非主流唱片, 令更多人可以去接觸佢地既歌曲.

生活炒雜碎 (第二回)

唔知係身體唔好, 定抑或真係老左(就快又大一歲~ 唉!), 呢個星期放工後一番到屋企食完飯洗完碗, 同B排排坐睇電視, 唔駛15分鐘就自動訓著. 仲要係扯晒鼻鼾果隻, 次次都要B半拉半扯推我上床訓. 好訓係好事, 但好訓成咁又會唔會係有病呢? 而家真正酣睡八小時, 無多無少.

#####################################
前兩日, 同事A提議落筲箕灣食晏, 一呼百應下包左半架小巴落去. 今次唔係幫襯"安利", 係幫襯另一間都算出名既麵檔"王林記". 佢地出名又係切腩同手打魚蛋. 我就叫左"魚片頭切腩撈粗".
一上枱, 一碟深啡色粗麵加幾塊切腩再加一碗魚湯片頭. 賣相一般, 味道都係一般. 隔離"安利"反而仲好少少. 另同事再叫左碟"豬手", 呢個真係全日highlight! 好味道到飛起~ 相都影唔切就挾晒!
間野超多人等位, 坐得超迫. 飯市可能要久候. 心諗附近有兩大報社:成報+星島, 一定有夜市做, 點知原來夜晚收八點, 無得宵夜!

點去? 地鐵筲箕灣站東大街出口出左轉行兩分鐘. 安利斜對面.

2007年7月12日

強劍定黐線?

番阿媽度食飯永遠完全有驚喜. 我唔係指餐飯, 反而係送飯既電視節目.

搬左出黎住後已經無左追無線劇, 只係有時響公司或阿媽度睇一集半集. 呢期無線除左狂谷"歲月風雲"外, 另一套就係"強劍". 齋睇宣傳片玩超低能玩漫畫化, 以為套劇係正經玩漫畫化. 點知...
尋晚番阿媽度食飯, 睇左半集"強劍", 真係O哂咀滴晒汗! 對白不停"時代化", 乜野"出奇過出奇老鼠"呀, 又玩自動mute粗口. 嚇到我即刻想番屋企. 諗唔到又係一套想玩cult既而古而今既古裝劇.
我唔係唔玩得, 只係太突然又出人意表, 自己一時接受唔到, 俾D時間我啦~


伸延閱讀: 強劍預告片

長篇荒謬啓示錄: 我不是一個膠袋, 但我非常硬膠

今日SCMP頭版有段文章笑左我成個鐘! 講近期大熱既環保袋終於有貨, 但好笑在個包裝極之唔環保: 一大個膠袋包住一個自稱"不是膠袋"既環保袋, 如果響Threesixty(惠康姊妹店)買既話, 再會用兩大個惠康膠袋袋住出門口, 好諷刺. 但最好笑係有環保團體話: They wanted to encourage people to use fewer plastic bags, but packaging was wrong. There's a contradiction. 咪玩啦, 咁都可以睇唔出真時裝同假環保咩?

伸延閱讀: I'm not a plastic bag - but I'm wrapped in one

2007年7月11日

Fancy a bum?

搞搞震既整人電視節目永遠係節目表上最剎食既節目. 你睇加製"Just a Laugh"全球熱播就知呢D節目本事利大. 但係碍於要可以全球播, 永遠要玩得好規矩. 唔可以過火位. 但反而總係有D係例外.
呢個由英國Channel 4製作既節目"balls of steel"就係其中一個. 入面有好多唔同既嘉賓出街去整蠱人. 其中一個環節叫"Big gay Following"就搵個麻甩出街向男途人問: Fancy a bum? (鍾唔鍾屎忽?) 途人除左錯愕之外就真係識得傻笑, 直男當街當巷俾基佬性騷擾, 但又唔覺太冒犯反而覺得好好笑好荒誕. 之但係心諗一個唔覺意撞正個同好, 又會點收科呢?

再引申, 如果響香港, 有個麻甩周街搵男人摟"屌". 除左可能俾人打左無數咁多次外, 就算節目播出街, 亦有明光社果班無謂人投訴到爆.
另外呢個節目最出位果集係舊年向Tom Cruise噴水, 上晒國際頭條.

2007年7月10日

買鞋記 aka 12號腳買11號鞋

第一次買Columbia呢個牌子既戶外鞋係五年前, B送左對鞋俾我. 難得果時響"馬拉松"仲可以搵到12號(美國碼)鞋! 一著就五年. 亦有兩年前開始成為佢地既fans, 開始轉用佢地既產品. 除左便服鞋, 始終係Rockport係十幾年以黎唯一既選擇.

五年後既一日, 因為落雨發現對鞋入水先至知對鞋底穿左. 畢竟都五年, 呢個牌子已經好耐用, 但始終爛左都要換過對. 所以就走番去"馬拉松"買番呢個牌子既鞋. 但行過好幾間太古既連鎖體育用品連鎖店, 佢地都話最大只有11號. 走去兩間Columbia專門店亦都係相同答案. 結果忍唔住真係打去問太古... 原來真係無再入12號鞋!

我真係笑左出黎. 原來香港係得我呢對12號大腳會響本地買Columbia鞋. B提議上網買, 但要老練咁遠去到英國網訂, 每對七百幾蚊未計郵費. 之但係, 我真係未試過網上買鞋, 寄錯size顏色甚至款式點算呢? 真係膽搏膽!

就響呢個時候, 我不經意咁拎起對Rockport睇, 咦? 11號鞋?? 既然11號皮鞋都算做舒服, 咁11號"波鞋"都可能會一樣卦. 結果決定去試一試11號鞋.

又再問幾間"馬拉松", 今趟佢地話11號鞋都賣晒! 天呀!!! 真係咁黑仔?? 走去專門店, 竟然佢地有一千零兩對!! 嘗試試一個較硬既款式, 11號真係好細, 好窄好唔舒服. 正想放棄時, 店員問不如試埋另一款較軟. 一試之下, 呢個都可以接受, 當然無12號咁自由奔放. 但作為一般行街都可以接受, 自知唔多運動, 所以真係唔會多想. 結果....買下呢對. (我買既係紅色, 橙色太橙. 好難頂!)

我估我對腳都唔會再長(發)大卦.

2007年7月9日

試片室: Evening

當本地觀眾大鬧"女人本色"根本就唔係女人戲而只係親政府商人拍俾阿公睇既樣版戲. 原來美國亦有套女人戲上緊..."Evening" 賣點: Michael Cunningham!!

佢上次套'A Home at the End of the World"真係一場悶戲. 幾乎再之前"The Hours"有幾多分都被扣番多少. 當然"The Hours"真係唔好多睇, 廢事舊病復發.

今次改編"盜美人"作者既小說, 講述阿媽講後生時荒唐事俾D女知. 似曾相識? 十六年前有套叫"Fried Green Tomatoes"(港譯: 笑傲同行)既女同片, 一樣有阿婆講後生荒唐事俾後生知. 但唔知點觧, 呢類故仔永遠最感人. 更何況今次卡士強勁: Toni Collette, Natasha Richardson, Meryl Streep, Eileen Atkins, Vanessa Redgrave , Claire Danes, Glenn Close...再加靚仔:Patrick Wilson!

不過香港可以上既機會好微... 睇怕又要等碟!

2007年7月8日

神秘電影"Cloverfield"

呢兩日最多人談論既電影一定唔DH4蝦你老實變型根光, 而係一套連片名都無, 邊個主演又唔知, 只知係"Lost"及"Mi-3"導演J.J. Abrams 監製, 而且會係明年一月上映.
呢套用假working title叫"Cloverfield"既電影trailer岩岩上個星期開始響戲院播映. 因為成個trailer乜都無講係乜野戲, 只用DV cam拍一個party既情況根住停電, 街外有怪叫, 根住班人就走出屋外見到紐約一處冒出好大個火球, 大家就爭相走落樓. 個trailer拍得好raw好真實.
就因為派拉蒙做足保密工夫, 連傳媒商借段trailer都唔肯, 其他消息更加唔講. 結果惹黎好多影迷談論. 個個都響到估究竟呢套係乜野戲呢? 有傳係一套怪獸片. 不過是真是假, 呢套戲用咁低成本去宣傳就可以用咁大效果, 真係超值.
不過, 記唔記得幾年前又有一套戲用類似手法去宣傳一套超低成本既戲:"Blair Witch Project", 結果全球大收幾億, 但套戲有幾難睇大家都有目共睹! 希望呢套又唔會係B級片扮大片.


伸延閱讀: CNBC率先報導

官方網頁

2007年7月7日

以後連小說都唔好寫

呢次真係要講: 以後連小說都唔好寫. 黐忍線!

港 人 控 《 哈 利 波 特 》 作 者
入 稟 高 院 指 壞 孩 子   索 償 千 億

【 本 報 訊 】 紅 遍 全 球 的 魔 法 小 說 系 列 《 哈 利 波 特 》 第 七 集 大 結 局 鐵 定 本 月 21 日 開 售 , 萬 千 哈 仔 迷 熱 切 期 待 之 際 , 一 名 巿 民 認 為 《 哈 利 波 特 》 是 兒 童 文 藝 中 的 「 垃 圾 」 , 荼 毒 兒 童 思 想 , 昨 入 稟 高 等 法 院 , 越 洋 控 告 在 英 國 的 《 哈 利 波 特 》 作 者 羅 林 及 索 償 千 億 元 。   記 者 : 梁 瑞 珮

原 告 洪 殷 ( 譯 音 ) , 被 告 羅 林 ( Joanne Kathleen Rowling ) 。 洪 接 受 本 報 查 詢 說 , 《 哈 利 波 特 》 橋 段 差 , 意 念 天 馬 行 空 , 灌 輸 錯 誤 訊 息 , 人 不 勞 而 獲 , 更 指 自 己 及 兒 女 皆 為 《 哈 利 波 特 》 的 受 害 者 。
洪 在 入 稟 狀 開 宗 明 義 指 : 「 這 是 一 項 伸 張 道 德 , 對 時 下 『 垃 圾 兒 童 文 藝 』 的 控 訴 」 , 直 指 《 哈 利 波 特 》 是 大 堆 垃 圾 中 之 首 。

令 青 少 年 嚮 往 邪 門 玩 意
洪 表 示 , 他 於 04 年 慕 名 一 口 氣 買 下 四 集 《 哈 利 波 特 》 , 相 當 艱 苦 才 看 完 《 神 秘 的 魔 法 石 》 及 《 消 失 的 密 室 》 , 再 沒 勇 氣 揭 開 餘 下 的 兩 集 , 更 自 嘲 : 「 狼 來 了 只 有 兩 次 , 我 卻 做 足 了 四 、 五 次 仔 。 」
洪 批 評 羅 林 以 庸 碌 及 抄 襲 手 法 寫 書 , 既 沉 悶 又 缺 乏 創 意 , 以 巫 術 作 為 主 題 , 令 不 少 青 少 年 嚮 往 邪 門 玩 意 。 他 表 示 : 「 如 果 我 們 的 兒 童 頭 戴 尖 帽 、 穿 黑 袍 拿 魔 術 棒 、 掃 帚 、 念 咒 語 、 古 古 怪 怪 、 玩 風 水 、 算 命 、 求 神 問 鬼 … … , 這 無 疑 將 是 一 個 不 知 所 謂 、 充 滿 笨 蛋 的 世 界 ! 」
洪 續 稱 , 《 哈 利 波 特 》 使 人 氣 憤 的 地 方 是 將 無 知 、 迷 信 、 陰 暗 恐 懼 , 包 裝 成 「 童 書 」 , 向 兒 童 大 張 旗 鼓 , 以 巫 術 、 殺 父 母 仇 人 、 鬼 怪 等 為 主 題 , 意 識 相 當 不 良 , 是 把 「 邪 門 」 和 兒 童 結 合 的 畸 形 產 物 , 稱 為 「 童 書 」 就 像 變 態 佬 穿 上 童 裝 , 其 書 心 術 不 正 , 根 本 不 見 童 真 所 在 。
洪 形 容 《 哈 利 波 特 》 猶 如 兒 童 毒 品 氾 濫 , 荼 毒 兒 童 思 想 , 使 兒 童 誤 入 歧 途 , 甚 至 毀 掉 一 生 , 故 向 被 告 索 償 千 億 元 , 作 為 對 有 關 家 庭 、 兒 童 的 補 償 及 再 育 , 負 起 道 德 和 金 錢 上 的 責 任 , 以 幫 助 兒 童 更 正 確 認 識 人 生 、 大 自 然 、 科 學 常 識 等 。

身 家 逾 78 億 元 入 富 豪 榜
《 哈 利 波 特 》 面 世 10 年 , 一 直 是 全 球 最 暢 銷 書 , 前 六 集 已 經 賣 出 大 約 3.2 億 本 , 而 第 五 集 《 鳳 凰 的 密 令 》 將 於 下 周 三 在 港 上 映 。 羅 林 憑 《 哈 利 波 特 》 系 列 躋 身 億 萬 富 豪 榜 , 身 家 逾 78 億 元 , 是 英 國 第 13 位 最 富 有 女 性 , 為 今 年 美 國 權 威 雜 誌 《 福 布 斯 》 富 豪 榜 中 唯 一 入 榜 的 英 國 女 性 , 亦 曾 獲 選 全 球 最 有 影 響 力 人 物 之 一 。
不 過 , 《 哈 利 波 特 》 大 賣 的 同 時 , 卻 引 起 宗 界 人 士 擔 憂 。 宗 本 篤 十 六 世 在 未 當 宗 前 曾 指 《 哈 利 波 特 》 壞 孩 子 , 令 他 們 不 辨 是 非 善 惡 , 嚴 重 扭 曲 宗 ; 另 有 美 國 會 曾 以 反 邪 術 反 魔 法 為 理 由 , 公 開 焚 燒 《 哈 利 波 特 》 系 列 的 魔 法 書 , 禁 止 使 用 作 材 。 最 近 , 更 有 黑 客 聲 稱 已 入 侵 出 版 商 的 電 腦 系 統 , 將 《 哈 利 波 特 》 第 七 集 大 結 局 內 容 盜 取 , 並 在 網 上 揭 開 。

長篇荒謬啓示錄: 我不是一個膠袋

相信呢件係零七年最荒謬既新聞之一. 一個賣百二蚊既環保袋, 可以引黎港台兩地近千人通宵排隊搶購. 但因為數量有限, 結果引起鼓噪甚至有衝突. 有關公司甚至響電台出緊急通知希望響店外排隊買唔到既人散去.

響新聞片見到, 排隊有學生主婦炒家甚至菲傭. 有百人以"炒袋黨"去排隊, 係為左可以拎上網上炒, 開價千二銀. 結果如意算盤打唔響. 有外國遊客以為佢地靜坐示威, 亦有港女認為係典型港人心態, 乜都追一餐.

一個做價十幾蚊既環保袋, 俾明星用一用上一上鏡就俾人盲目追捧. 極之荒謬同扭曲兼硬膠. 如果一樣有咁多人支持環保同膠袋稅, 政府一定開心到不得了.

本地各大超市亦好應該仿效, 搵名牌設計環保袋. 再搵名人日拎夜拎博上鏡. 一上市一定又受到一班硬膠名牌奴隸湧到各大超市搶購. 既可以環保為名出一分力, 亦可以撈番一筆. 諗起都覺掂.

2007年7月6日

做乜忍相呀 ?

仲乜阿處長突然咁驚記者呢? 而呢位女士竟然唔知同行果位係邊個? 都係朱太好野, 一句" 唔講啦, 訓覺啦!"打完場. 朱處長, 你都係番屋企訓....把啦!

伸延閱讀: 朱培慶挽艷妝女子 見記者即避 / 朱培慶艷女同行狼狽避傳媒

Danny Summer

前排唔知點解買左呢隻CD既DSD版, 之前已有隻普通版. 但原來完全無浪費八十幾蚊, 因為音色真係完全係兩回事. 普通版CD失真得好厲害, 好似一層紗咁, 好濛. 但呢隻DSD版完全無呢個問題. 尤其人聲好出, 再加上成隻碟既感染力. 呢隻碟仍然係心目中夏韶聲最好既一張.
結果一不離二, 再入埋佢離開華納後既精選. 相同就係之前亦都有隻普通版. 不過唔知係咪原裝母帶巳經有問題, 普通版亦係好濛, 但新DSD 版似乎改善左好少, 亦無好似另一隻咁好聲.

不要問我從哪裡來

近期笑爆廣告. 好自嘲.

2007年7月5日

熟年蝦你老實

公司為左宣傳最新一集"蝦你老實"電影真係無孔不入, 就連員工都唔放過. 除左有員工招待場外, 甚至有同事扮鬼扮馬上黎請你飲野!

"蝦你老實"熟到咁, 唔知張秋有無反眼呢?
又或者女版""蝦你老實"...
伸延閱讀: 中文官方網頁

2007年7月4日

我在政府部门的日子

如果你期望有"小孩不笨"第一集果隻non-stop笑料, 呢套你可以skip.呢套只有好局部正既笑位. 搔到痕但唔持久果隻囉.

真係好奇怪, 用坡版直灌做港版, 依舊PAL線+Letterbox. 不過畫質普通. 但係SF豐富而且有個唔好笑既廣東話配音版本. 幾十蚊睇部幾好笑既戲真幾抵. (不過一定要揀原音singlish+國語.)

當然做政府工同番大公司可能都係無乜分別, 制度令人痴呆, 亦令人發笑. 笑唔笑得出就睇個人既修行啦.

2007年7月2日

想有好睡眠勿到黃金海岸洒店

話說星期五晚B話既然每次胡主席出巡都會封路封到塞死. 不如走去其他地方佢係唔會去既. 當然因為佢個簽証問題所以唔可以離開香港. 又要get away又唔離開香港. 唯有離島. 之但係咁last minute(當時係晚上十點半), 點訂房呀? 兼且假期前夕例必爆滿. 佢提議屯門黃金海岸酒店, 我唯有打去問仲有無房? 結果係有. 半walk in成千銀一晚. 乜都唔包心都赤埋.
呢間酒店響六年前都同B幫襯過, 感覺都好好. 尤其有個望海大露台, 好鬼正.
結果避得到胡主席但避唔到兩大妖魔!
星期六喪落雨, 為左避免濕身, 就放棄唔去尖沙咀搭佢地既接駁巴士. 改用極之誇張既路徑: 地鐵由屋企到美孚再轉西鐵到屯門再轉的士入去. 足足個半鐘先到! 耐到我響西鐵訓著. 結果真係唔濕身就到酒店不過車費就..........哼! 間酒店無乜變, 就係超多冚家合家歡, 成間酒店都係細路. 多到呢.... 仲多過大人. 記得上次D細路成晚通酒店走, 真係無覺好訓. 點知今年, 細路多但至少無周酒店走咁嘈. 但係有第二樣野嘈: 就係酒店地下間酒吧. 我地住二樓, 夜晚十二點響房已經聽到有好強勁既音樂聲. 打落去大堂問: 大堂話會搵人睇下. 一個鐘後, 音樂聲仲強勁左. B駛出殺手鐧! 佢直接走落去投訴. 我一直覺得, 一個中國人同一個外國人去做同一件既投訴. 通常外國人會係最快得到答案或解决方案. 唔信? 你試下打去D熱線電話揀英語對答, 一定最快被接聽.
無耐, B上番黎話個夜班經理開左另一間響高層既房俾我地訓. 如此同時, 間酒吧都無再播音樂. See! 都話外國人去投訴一定最快解决啦. 不過結果都成兩點鐘先上床訓, 攰過平時響屋企添!
不過要讚係個自助晚餐. 由味道到選擇都好多. 而且慶回歸所以身份證有"1","0", "9", "7"既任何一個數字既都可以全枱七折! 維起黎都係二百五十蚊一位, 喪平! 我口痕問我身份證有齊四個數字係咪仲會平D架? 呢次last minute假期完左, B又收到Oasis航空寄黎既傳單話教師買機票去溫哥華可以免費升級上商務位, 同行都有優惠. 佢問不如月尾去咯!
吓..................
(溫哥華十幾年前去過不過只係轉機留左三個鐘咁大把. 請問有乜景點可以介紹呢?)

2007年7月1日

十年三事

十年 茫茫然渡過 再也分不開彼此的差錯
從前沒結果 求讓今天補救 埋沒昨天的苦楚
請你 回來陪伴我 再與我今生一起過
燃亮著愛火 將心鎖打破 容納我這癡心的一個
過去真不應該 相愛但不懂愛 抹去心裡障礙
我願有新生一起揭開 請你回來陪伴我
忘記以往的風波 十年 茫茫然渡過
再也分不清彼此的差錯 從前沒結果 求讓今天補救
求明白我 來再開始過 過去真不應 相愛但不懂愛
抹去心裡障礙 願瞭解怎麼相愛 對你的愛永在
以後也不變改


回首十年, 三件事最令我有深刻印象. 零叁七一遊行. 我覺得果次遊行係最成功最齊心. 目標鮮明, 每人都知道自己想要乜. 更令政府真正有少少改變. 可惜果日要番工, 只可以望住電視去支持.
經濟低迷, 相信果時每個人都好低落, 人人負資產失業破產. 無一個生活得開心, 日日都有人自殺.
SARS. 日日聽到幾多人感染幾多人死去, 心諗自己都可能難逃一劫. 結果好彩留低. 可惜點都唔會忘記果個四月一日. SARS再加張國榮自殺, 當時我真係崩潰. 相信世界就快末日, 香港就快走上末路. 雖然最後捱過左, 但都死左唔知幾多細胞.
套用當年我響自己網站既一句:
向死去的病人致意慰問.
向過世的名人致敬.
向醜惡的高官唾罵.

寫在十年.