My Christmas Gift

今年得到既聖誕禮物. 真係意想不到. 多謝B.

恃老賣老

有時, 敬老同公平真係好難共存. 尋晚放工等巴士返屋企時, 有兩位五六十歲既師奶突然插隊企響我後面. 因為後面至少仲有六七十人排響我後面, 基於公平我就同兩位師奶講: 龍尾響後面. 但呢兩位師奶話岩岩排錯隊, 等條龍上晒車先排尾.
ok, 就俾佢地企響側邊等.
點知巴士一到, 呢兩位師奶竟然跟住我地準備上車. 後面有人睇唔過眼, 大聲喝止: 喂! 排隊啦, 咪以為老成機打尖. 兩位師奶亦不甘示弱, 邊行邊大罵: 駛唔駛咁大聲呀, 咁咪俾你上車先啦.
結果兩位插隊既師奶亦打尖成功優先上到車. 可憐龍尾既十幾人要繼續等.
無錯,我地係要敬老. 但如果有人為左拎著數而恃老賣老, 我會覺得...你點解唔早D死?

婆婆

舊年發現肺癌擴散, 已經係中期, 但因為太老, 醫生都唔想佢做化療. 我地唯有開開心心過埋佢餘生. 上星期突然轉差, 送左入醫院. 起初佢狀態都幾好, 但呢個星期轉左去南朗醫院就差左. 呢兩日甚至神智不清. 直至今日下晝2:20. 佢安詳咁離世.
果一煞那, 過去三十幾年, 我發現我欠左佢好多.
我會記住今日, 十一月三日下午二時二十分. 照顧左我地三十幾年既婆婆離開左我地.

唉,又要搬

住左呢度一年零三個月,屋主一個電話要將單位放盤, 又係時候搵地方搬.
住慣左呢度又靜又方便, 只係上山落山真係身水身汗.
希望今次搵樓唔會好似舊年咁搞到一鑊粥.

唔扮野做自己

香港樓市好左可能係好事, 但引申到出現左個怪現象.
以前樓盤廣告一定用好大篇幅話自已個盤有方便, 間格用料有幾好, 一切都係最實際去出發.
但近呢一年既樓盤廣告就變得好虛華. 金髮美女俊男飛機遊艇曼哈頓東京, 要幾離題有幾題. 試問紐約既飛船同大角咀海景樓盤有乜關係? 澳洲黃金海岸靚女講左聲: Absolutely Beauty同西灣河樓盤又有乜野關係?
都係大陸樓盤最實際, 明價明賣. 唔扮野做自己.

我以港人為恥

每次聽到話香港人唔好, 總有人話係D大陸人差落左黎香港搞差香港.
但現在我好相信, 呢個只不過係香港人自圓其說, 為左掩飾自己既惡行.
今日路過旺角, 走進間越南餐廳食午飯. 午飯時間特別多人, 我被編到近門口既一張檯坐. 雖然近門口, 但見玻璃門關上, 可以阻隔街外熱氣同車來車往既污塵. 我先無異議.
跟住每每有客人進出, 都無人願意順手閂門. 頭一兩次我仲可以起身閂門, 跟住我只好同店員話請佢地閂門, 但佢地都唔係幾願意閂門. 到最後我忍唔住同一個岩岩入黎但又唔閂門既肥仔講:可唔可以順手閂門? 佢望一望我千萬個唔願意咁閂門.
原來公德心呢樣野, 響香港一早死左八九成. 只係閂門小小動作, 又可以防止冷氣流失, 又可以阻隔煙塵. 香港人都寧死唔做! 可恨沙士無滅左香港, 可恨負資產只能令到少部份炒家跳樓死. 我寧願香港可以死過翻生, 重新教育一班有教育過既市民.
我以港人為恥! 如果有人問我係乜野人? 我寧答:我係華人. 死口不認香港人.

我遇上扑頭黨

今曰下晝正想同B出去睇戲, 就響好多人等車既英皇道巴士站, 有個男人突然好大力一野打落阿B既後腦. B受襲後同我講有人打佢, 我同佢一齊向後望, 見果個男人向住我地笑. B正想上前理論時, 疑犯即刻逃走. 我地即刻從後跟隨. 點知半路B扭親腳追唔到, 我唯有上前問佢傷勢, 亦有其他途人上前慰問. 其中有位中年男人繼續追捕果個疑犯. 過左幾分鐘, 我同B繼續追查疑犯下落. 就係呢個時間有好多警察向東跑去. B都懷疑:唔通有人捉到佢? 咁我地一直行到華豐國貨門外見有部警車停響到, 亦見個協助追人既中年男人同D警察傾緊. 而且中年男人亦見到我地, 我地上前就有好幾位便衣警察問B係咪俾人打劫? B話唔係, 只係俾人打. 原來中年男人真係追到個疑犯! 疑犯一直跑, 跑入華豐國貨入面買野, 中年男人一直尾隨著疑犯一面報警. 直到警察趕到, 中年男人就指示警察捉住果個疑犯.
結果, 疑犯, 中年男人, 我同B一齊上左警車, 直去北角警署落口供.
點知, 中年男人, 我同B一齊響接見室等左兩個鐘, 先至有C.I.D.同我地落口供.
更神奇係警方以為疑犯係劫匪搶左B個袋. 我地先同佢地講清楚係疑犯好大力打左B個頭一下, 我地無金錢上損失. 點知佢地警方同我地講左幾樣幾震撼既野:
1)疑犯個袋有個鐵鎚!
2)疑犯身上有精神病覆診咭.
3)疑犯走入華豐國貨後買左四條底褲.
咁我地咪好好彩?? 一個精神病患者拎住個鐵鎚週街走, 但又無個鐵鎚扑阿B個頭, 只係用手打?
經過四小時又等又認人又落口供後, 警方問B追唔追究被打一事, B話唔追究, 但警方仍然會落案起訴疑犯藏有攻擊性武器.
行出警署, 天都開始黑. 我諗雖然無左一日, 但諗唔到原來香港人並唔係無情, 中年男人竟冒險去捉賊. 見義勇為足見人情並未太薄.

偷窺●男

自從去年搬到現居大廈, 我發現對面大廈某戶戶主甚愛窺看對面大廈的動靜. 我向來都將睡房窗簾關上, 但係有時都想打開窗簾透下氣. 咁我就發現呢位戶主不停偷望呢面既動靜. 坐響度睇唔清楚? 索性企起身睇. 講真有乜好睇呢?

五元五毫

只需花五元五毫, 就可以買得到上等...

牙簽一大盒. 夠用一年.

Fool Massage

每次經過銅鑼灣既謝斐道, 除左第一火煱那位員工仲記得我貴姓雖然而無幫襯成年. 就仲有一位小姐會響你耳邊叫"Fool Massage". What?? 世上乜有種叫"Fool Massage"? 係專幫Fool去massage定massage完就會覺得自已係個fool呢?
接過傳單, 紙上印住"Foot Massage".

生日快樂

祝自已今天生日快樂.


步入中年上