M記超強勁發明: Microsoft Surface

記得N年前睇"未來報告"時, 入面既高科技已經嘆為觀止. 至少touch screen呢家野可以響LCD大電視移物寫野畫野已經廣泛使用. 但總係覺得唔夠. 誰不知M$用左5年時間秘密發明左呢樣野, 一樣完全改變我地日常生活既發明. 由家居公事消閒購物一一都可以應用到. 講多無謂, 去片!


仲延閱讀: Microsoft Surface 官方網頁

歲月流影 (1)

東區之友, 估下呢度係邊度. 要影相就要快, 因為好快就要拆.

好味午餐

唉! 千祈千祈唔好遲食早餐, 成十一點先食完個老麥4號早餐, 一點鐘點食午餐呢? 而且成朝忙到唔停手. 唯有兩點先落去附近Pret a Manger執件熱辣辣既"黑椒牛肉卷"頂肚. 記得Super Sandwiches都有, 可惜永遠凍冰冰, 反而Pret a Manger既就熱辣辣, 有得揀, 梗係揀熱啦!Starbucks之前出左呢隻香蕉星冰樂. 點知一飲上癮! 個個星期都要飲番兩三杯先得. 我尤其喜愛香蕉碎朱古力星冰樂. 真心好飲!!

碌冧

前晚趁住雨停左我地兩個就想出去食飯. 但係將軍澳大多數餐廳都試過, 只差"將中"將軍澳中心商場未試過. 況且之前響區報介紹過佢地有間法式越南餐廳. 咁就决定同B去試新菜.

點知去到先知呢間碌冧係鴻星酒家集團旗下, 當堂打個折.

自從年初試過公司樓下間新開鴻星酒家, 真係留下深刻壞印象. 我地十幾人被安排入一間細小VIP房, 點知VIP房間入面原只可容納一張大枱, 結果三十幾人分三枱迫響一間細VIP房, 背貼背椅貼椅. 極之唔舒服, 至於點心? 樣係好靚但可惜極之唔好食. 所以我地無再去過, 今回再次入虎口, 希望唔好又咁差.

結果, 今次黎次反高潮. 叫左幾個小菜都唔錯.上圖: 越南四拼, 牛油雞翼, 牛肉蝦片, 春卷, 蝦粉卷. 四樣都唔差.

上圖: 越南地雞. 我間waiter究竟係乜野雞. 佢話其實係鹵水雞. 點知上枱後先發現其實係海南雞. (相片偏紅)

上圖: 蒜蓉炒野菜, 成晚最好味既一碟.

價錢合理, 服務ok, 上菜又超快. 食得幾舒服. 響一個"死場 "有間咁好既餐廳確係有D可惜. 不過相信我地都會有得番轉頭既.

Google Earth

我實在太後知後覺. 近日先響電腦裝上Google Earth呢個軟件, 點知即成B既玩具, 投入程度簡直係日日都要玩兩三個鐘先罷休. 甚至試過一路玩一路打電話俾阿媽話見到佢地間屋云云.
講真Google Earth唔係新但確係一個幾突破既軟件, 打上地址門牌, 一張衛星圖片即刻連間屋有幾大都即時奉上. 真係瞬間看地球!

監獄浴室裡的誘惑

小心你個"米"字!

鬥氣

近日最好睇最好笑既新聞一定係台北政府決定將凱達格蘭大道加註為"反貪腐大道". 呢條大道就正正響總统府前, 好一大巴掌啊!
之前, 民進薰不停用正名而"去蔣化". 就連"中正紀念堂"改名為"台灣民主紀念館", 係完全好荒謬既事. 歷史從來係一個國家甚至人民重要既財產. 而家係將歷史選擇性刪除, 咁對呢一代或甚至下一代有好處嗎? 對上一代或經歷過既人黎講係一種侮辱. 正如香港政府好唔正常咁拿拿臨拆左天星碼頭一樣, 雖然為左未來發展確可能有需要犧牲, 但好不幸既無保存文物反而當垃圾咁掉左就真係好反感. 今回國民黨雖玩鬥氣, 但用上一次好聰明既做法, 既市民接受同支持, 又唔會影響市民既生活. 好過台灣政府改到民怨沸騰.

講起天星, 其實我覺得既然政府願意重置皇后碼頭, 我都唔介意碼頭消失一陣, 總好過唔拆變成公路邊既涼亭. 而家所謂集體回憶極之濫情, 根本係假保育真搞對抗. 真正集體回憶係長埋心中, 而唔係攬住唔放. 以往尖沙咀火車站统一碼頭卜公碼頭大角咀碼頭甚至佐敦道碼頭連個鐘樓被拆時, 班反對既人又去左邊呢? 唔好話俾我聽"我都未出世!" 佐敦道碼頭卜公碼頭被拆時都只係十多年前. 或者因為我地呢一代殖民地教育出黎既都係乖乖聽話, 回歸後一代對於自己身份都搞唔清, 響一塌糊塗之下易受人控制, 重現67暴動時既情景.
我唔係話以後都要聽政府話, 只係希望大家可以用另一角度去睇同一件事, 再加上獨立思考, 必定可以好好做人.

又講起鬥氣, 最近我都睇到一件鬥氣事. 就似兩個小朋友玩泥沙, 兩個都唔抵幫: 一個衰麻煩長氣人緣差, 一個就過分堅持己見兼悔氣. 一句"以後最好連小說都唔好寫"悔氣說話可以搞出連番大戰. 悔氣說話從來都唔make sense. 但有幫助咩? 一個人網上犯左罪被拉就走出一句呢隻悔氣說話, 要係犯左另一種罪行被拉, 你會講"以後最好連人都唔好做"嗎? 或者你會, 橫掂你都成日嗌自殺.
要鬥氣? 你咪繼續囉.

Coming Out Insurance

如果真係有D咁既保險賣, 我相信生意都會不俗喎.

It Won't Be Soon Before Long - Maroon 5

剛買左, 聽緊. 好好聽. 尤其主打"Makes Me Wonder".

Judge John Deed

呢兩個月迷上BBC Entertainment入面一個電視劇"Judge John Deed".

一個非一般既法官, 有自己堅持既信念, 周旋於女友政府貪官上司同事前妻女兒犯人. 好睇就好睇在套劇並唔似無線劇咁不斷情情塔塔三角四角男女男男女女. 呢套就多數時間放響案情, 而且用上極大量真實法律名詞, 甚至極之仔細既科學常識. 我好相信如果無中文字幕, 劇中有大量艱辛深字, 我會睇得好辛苦. B呢類法律人當然睇得津津有味.

每集除左條對貪官同政府對抗既主線外, 都會有唔同既case. 好似上星期講"Big Brother"呢類真人騷同傳媒對社會既影響. 之前更有Bi-Sexual商人同男友既金錢交易內幕引發政府危機. 極之update!

講起資料搜集仔細, CSI LV都算係俵俵者, 可惜最近呢個season, 男主角走左, 黎左個神化replacement, 搞到套劇都變得神化兼求其.

如果你屋企有Now TV又有裝BBC Entertainment,不妨逢星期日晚七點花個半鐘去睇下呢套劇: Judge John Deed. 呢個星期開始播series 5.

P.S. 當然唔少得百看不厭笑到肚攣既"KEEPING UP APPEARANCES"啦! 必睇!

忙忙忙

呢個禮拜真係終極破紀錄! 連續幾晚晚晚十二點幾先走得甩! 之前分工都無試過所謂放暑假浪潮既衝擊. 點知原來呢個暑假浪潮仲慘過之前幫英國喪諗點用冬令夏令時間去排節目.
日日十三四個鐘工作, 除左番工, 真係乜都無興趣/時間去做. 飛的番到屋企已經成個人散晒. 連想同B傾下計都懶郁. 甚至試過涼都無冲就碌上床大覺訓.
以前做仔讀書就恨放暑假, 因為暑假永遠係最美好. 而家, 我就想暑假快D完! 等我地過番D正常既生活.

P.S. 如果見幾日我都無寫blog覆留言? 或者我正在工作昏迷中.

香港人...黐晒線! 文化大革命2007

唉, 有塘心風暴睇咪去追囉. 做乜事搞呢D野呢?

網民投訴聖經不雅千四宗

影視及娛樂事務管理裁定中大學生報的情色版為二級不雅物品後，過去兩天，他們收到千四宗對聖經的投訴。

一批網民不滿有關裁決，在網上發起向影視處集體投訴聖經，認為內容會扭曲讀者的性觀念。處方兩天內已共收1406宗電郵，現正處理投訴。

如果你係中大校報支持者去搞呢樣野, 我覺得好幼稚. 如果係果班學生搞出黎? 就更罪加一等. 死得, 無得救.
要投訴? 其實仲有其他野可以用黎投訴. 無需將他人既信仰擺上枱批鬥. 你估而家係文化大革命咩? 文化大革命會死人架! 香港人做野係咪唔理後果唔理責任做左先算呢? 之前我仲叫人有獨立思考, 點知原來個個都無腦. 真係"思你屎忽".