2007年6月17日
62
其實, 應該由星期五晚開始講起.
又或者應該係由星期一開始講起...
原來自己咁多年我一直記錯B既生日日子, 我絕對唔係一個好情人. 無可能年年都記錯卦! 就係咁邪, 六月記錯五月, 結果俾佢嬲爆. 舊年還好, 記得好清楚, 所以無記錯兼無俾人嬲爆. 點知今年自己既記性再差, 十六記錯左十五. 結果訂完枱十五號食飯, B好心提醒: 我生日係十六號. 噢! 又記錯. 好在佢無嬲.
今次我地去假日酒店食自助餐, 點解佢果度呢? 因為B有次隨海軍到港係住響果度, 所以為佢帶來好多回憶. 所以今次係為左"集體回憶". 自己甚少去酒店食自助餐, B果隻"小胃口"更加蝕大本! 不過之前我都同同事去過假日酒店食自助餐, 我都覺得唔錯. 不過今次見食物種類少左, 但依然好味. B依舊少食多滋味. 無法, 生日大晒. 或者下次我地應該去番九龍酒店, 始終佢地仲係我心中No.1!
尋日朝早陪B上港大拎完野後, 我地就碌下灣仔諗住食完晏就去睇個旅遊展. 生日既當然大晒, 結果走去幸福樓飲茶. 心諗食晏時間無乜可能有枱, 點知多枱可以任揀, 成個茶市都水靜河飛. 我又唔覺野食差, 價錢都好平, 只係污糟少少, 個茶盅一放上枱就有個黑印印上枱布. 兩個人百一蚊平過去稻香.
自從上次個投資博覽揾笨到極點, 今次去呢D展覧真係小心左, 更何況今次要收入場費! 不過, 今次呢個旅遊展都唔錯, 至少俾到我地(尤其B)呢D話去旅行但唔知去邊好既人一個唔錯既idea. B成日話想去埃及, 結果果度一位黎自埃及開羅既旅行社負責人同我地傾左一陣, 就更加令B更想去埃及. 之前因為佢既工作狀況唔明朗, 所以我地個trip押後. 但我知道, 當佢搞掂個working visa同份新工, 相信我地真係可以出去休息下.
講番個展覧, 其實都唔差. 部分攤位都有用心佈置過, 甚至有當地人仕著晒當地服飾去推介佢地國家. 經過新假期個攤位, 我地一時發癲, 同盈盈樂樂兩隻熊貓一齊影封面. 嘩! 好喪呀!! 但因為張相太喪, 都係唔好登出黎, 廢事令你作嘔!希望下年我會仲記得六月十六日係B既生日.
2007年6月16日
千歲
盧巧音 - 千歲
曲／編：梁翹柏 詞：游思行 監：梁翹柏, Gordon oyang, 盧巧音
紅雲起 安守到藍霞過
風冷月浮起 半生裡小風波
熱血天 發誓青春要為誰蹉跎
你 問我怎會這樣傻
朝晚日浮起 天終了又沉過
出世從無想 晚景會有坎坷
從前你 長高就是等到我伴成天鵝
我 命裡走過甚麼 也比不起你的痛楚
願我有百千歲 扶著你共散步我不覺累
幸福千次暖著我的嘴 才令愛沒有逆勢減退
步向世界之最 來日你或撇下我先去但拒絕流淚
和你的得失早同在 絕世的一對
由孩子 今生去完成我
當種下蘋果 懶數算那麼多
如何愛 只知是付出得到便成總和
我 沒有恐怕甚麼 有你一生已經夠多
願我有百千歲 床畔每日照料我不覺累
幸福千次暖著我身軀 才令愛念永沒法失去
步向世界之最 來日你或會逝去彷似日褪落長睡
讓晚色祝福於雲內願你有百千歲
陪伴我在每夜抱擁進睡讓這福氣暖著我的腿
餘下快樂要為你奔追步向世界之最
來日你定會共我相約在世外長聚
和你的得失早同在 絕世的一對
送給B, 生日快樂.
2007年6月15日
iPhone勁敵: HTC Touch
Apple 既iPhone吹左咁耐就快上市, 但係香港仍然遙遙無期. 反而有廠商就響呢個時間推出類似既產品: HTC Touch.
講到尾, 都只不過係一部行WM 6既PDA手機, 不過勝在獨有"TouchFLO"技術. 以往行WM5既PDA手機字體細, 每次要操作都要用支筆篤篤下, 都幾煩. (好在我果部仲有keypad有得揀!) 但呢部Touch就無呢個問題, 一切都可以用一隻手指控制晒. 只要用手指響螢幕一掃就可以操控機內功能, 極之好玩. 想知有幾易? 去片!
雖然有呢個"TouchFLO"技術再加率先行WM 6, 但係config好一般: 只有三頻無3G, 只有二百萬像數相機, 有wifi但無GPS. 不過價錢就真係超值, CSL淨機價:$3680. 平過同系Dopod既機!
2007年6月14日
CNN Street
廣告時間: 為左宣傅CNN節目:Future Summit-Virtual Worlds, CNN特登做左個online game俾觀眾玩, 而且嬴左仲有得抽獎, 大獎係Wii遊戲機一部. 快D埋黎睇理黎玩勒喂~
可惜公司講明員工有得玩但無得抽獎. 扯~~~
2007年6月13日
我從盧巧音聽見王菲 - Process
一過兩年, 較早前一首"走慢點"完全脫離佢以往既形象, 接近首張EP"不需要...完美得可怕"那種raw既感覺. 但始終國語歌, 電台好少播. 第二首派上台"愛到不能", 第一次聽以為係王菲既歌, CY kong既曲係保證, 但自從經雷生一役之後, 雖則為佢帶上頂尖擴大左樂迷層, 但盧巧音係咪需要呢種K歌呢? 首歌唔差, 仲易上口添.
將新碟拎上手, 金碧輝煌. 俗係俗左少少. 但設計果位係.... ~ 收貨!
全碟歌曲由"空白"既娃娃看天下, "圍牆"既年少不知仇之味. 成年隔莫既"默音", 更年期怨鬥既"愛到不能, 老有老伴既"千歲"及"沉默不是金". 其中"沉"歌係王菲既畫外音嗎? 定係失散既兄弟姊妹嗎? 真係... 原來"走慢點"放到最後才叫一個人生既終點, 想捉緊餘下光陰, 唯有"走慢點".
今次"Process"確係比上張'天演論"易明同易接受. 只係少左佢之前果種堅持及K歌. 有辣有唔辣. 又或者我地都太餓王菲, 將盧巧音錯配自動對號入座. 從盧巧音聽到王菲, 我真係思覺了.
盧大偉的gag
1 ) 邊種動物唔以父母為榮, 係以兄作父？答案係雞，幾時見過雞講 "爸爸媽媽 " ？ 佢只會"哥 哥 (咯咯), 哥哥(咯咯) " 咁叫！
2 ) 獅子老虎好鍾意同人溝通，求知慾好強，你拎相機去到動物園對住獅子老虎影相時，佢會問你究竟點影："how(吼)how(吼)。
3 ) 隆胸隆一對價錢一萬, 但隆一邊話並唔係一半價錢 5 千，3 千就可以, 因為合約寫明 "一波三折"
4 ) 有人想開拍一部"無間道警犬"，於是搵老細投資，但當老細知道古仔之後即刻唔制，因為古仔係講 "搵狗扮賊"
5 ) 食煙仔辣親手指罅─ ─ 煙仔俗稱鏹，支鏹燒到辣親手指罅，即係燒到盡頭─ ─ 牽鏹(強)到盡.
伸延閱讀: 忘記對白焗爆食字Gag 盧大偉最怕辣阿姐
2007年6月12日
2007年6月11日
大鄉里出城: 又一城
上星期仲話嬲佢累我留響屋企, 點知星期六同我攤牌, 最後我既意志始終戰勝佢既狂燥. 無事.
結果尋日終於有得去街街. 其實都係陪佢去Page One買書.
lunch @ supersandwiches
上星期響Oliver有個極之恐佈既遭遇. 諗住食個快晏, 走去幫襯買左個熱狗餐. 拎到番公司, 沙律難食都算, 點知一打開個餐盒, 條熱狗被斬件之外, 仲將D醬汁淋滿兩條熱狗上, 直頭多到好似人地煮餸淋個"獻"汁咁. 又紅又黄, 一揸上手未食都已經成手醬, 極之嘔心. 所以決定唔敢再去幫襯Oliver. 可惜尋日, 又一城真係無啖好食更加無位好坐. 唯一有位就係Oliver! 而且仲有兩大張吉枱, 好奇怪. 一坐低先知乜事.(後話) B叫左兩個餐: 雞漢堡配薯角跟酥皮湯. 賣相可以, 味道都可以. 只不過六十幾蚊價錢就略貴. 至於後話呢........... 請各位老婆唔好響食肆內幫你老公搽跌打酒. 果陣味呢.... 極之濃烈, 好難散! 事緣原來隔離枱有對夫婦, 老婆幫老公既手搽跌打酒, 極之怪誕兼難聞. 唔怪之得無人敢坐埋去.Shopping @ Page One
B搵唔到佢要既書, 反而我搵到一本幾有趣既書. 係由Page One自家出版既名叫"Uncredited"既畫冊, 所錄左過百部電影open/closing credit既圖片, 並frame by frame去解構設計. 隨書仲付送DVD一隻, 收錄果D電影 open/closing credit既片段. 二百六打個八折. 極之抵睇!
2007年6月10日
我係邊個邊個, 我都聽Mika
近月聽BBC, 佢地就狂谷另一首single" Love Today". 呢首反而甚得我心. 呢位假音人有晒energy, 聽得人好興奮. (但令我諗起林子祥某隻舊歌!) 搞到我心郁郁都買隻黎聽, 確實有少少驚喜. 入面既歌多數都屬於輕快輕鬆, 令人脚印印. 呢類感覺只有上次SCISSOR SISTERS - TA DAH俾到我. 今次全碟最鍾意除左"Love Today"外就係"Happy Ending". 確有少少感動位.
從來都唔鍾意Graham Norton Show , 仲慘過睇志雲飯局. 但Mika出現加上佢既精彩現場演出, 確係真心正!
訂閱：
文章 (Atom)
