荒謬日記

Hello World!

2011-04-05T12:00:00.001+08:00

連手機都可以出文了。
我又重回人間。

重開?

2010-05-09T19:58:00.000+08:00

究竟係無口齒定抑鬱復發, 又會有新文享出現響呢個地方?
多謝幾位過去幾個月不時的向我開解, 向我分析路向, 俾我一次可以再睇清楚個方向. 我知道之前我作出既決定係好大膽, 全因當時我確實有少少迷失, 原本以為將一切reboot可以重頭黎過. 點知過去既兩三個月有更多事響我身上發生, 呢段時間我曾經喜歡上兩個人, 一個慶幸真相及時出現, 否則只會更傷. 一個就及時抽身, 無謂令大家傷心. 或者愛情離我太遠太久, 一踫到就似糖黐豆, 甩都有排甩.
今天我就當自己reboot後再上路.

人生可唔可以reboot呢?

2010-02-22T23:47:00.000+08:00

人生可唔可以reboot呢?
以前睇戲, 戲中一個普通人可以由呢個國家既東面放棄所有走去西面重頭開始.
終歸都係戲. 但現實又有無呢個可能?
近來我會用上搭港鐵果20分鐘車程去思考人生, 今晚既題目係:reboot.
一切都重頭開始, 重頭找新工作, 重頭認識新朋友, 重頭開始新既生活.
我覺得現在, 世界很糟, 但我更糟. 如果可以重頭開始, 或者可以令呢位糟老頭既我有更好生活.
當然, 響中國大陸, 生活可能比我更糟. 要reboot, 可能只可以原地開始.
如何開始? 離開現有既生活/圈子/朋友/家庭/工作或者係無所避免.
所以,
荒謬日記算做告一段落. 餘下, 梅玲/msl應該係下位. 餘下只能按步就班地去.
再見.

荒謬影話: Surrogates

2010-02-20T18:15:00.001+08:00

原以為Bruce Willis喎, 再加Jonathan Mostow喎. 一定非常ok. 原來唔多唔少都係一廂情願, 世事邊有咁完美. 正如戲入面一樣, 當所有機械人都係咁完美, 最醜怪仍然係人類.
上回James Cromwell響i-Robot入面又係發明機械人造福人類, 今回再做類同角色, 唔多唔少有炒冷飯之嫌. 只係一開始就反駁, 臨尾再整個反高潮吹到大家啤一聲., 已經算全片之中其中一敗筆.
Bruce Willis行貨式演出更突顯劇本確實不濟, 好多場面都濫情得失笑. 劇本不濟導演唯有用動作特技去填充, 可惜九流特技效果, 慳皮既製作下, 成套戲淪為一部大卡士既C級製作, 最重要就係唔好睇.
睇完之後, 心中留下: 究竟部戲係想表達D乜呢?

7支笔

2010-02-13T01:52:00.000+08:00

兩傻遊曼谷 2009 (三)

2010-02-07T17:19:00.000+08:00

結果三點鐘音樂終於停, 可以瞓到八點. 一起身出門除左去食早餐, 就係搵領隊換房. 其實領隊都係住響同一層隔幾間房, 佢話成晚都聽唔到有音樂聲. 之不過職責所在, 佢都係幫我地換房.

早餐過後, 因為B要去文華東方酒店搵野, 速成今日最主要行程: 文華東方之旅. 最終, B搵唔到佢最想見到既野. 反而我地可以由職員帶住響酒店行左一轉. 呢間酒店果然係名不虛傳, 就好似鬧市中一個世外桃源, 搞到我下次都想響呢度住番一兩晚. B建議不如我地坐佢地既接駁專船番去BTS站.

因為時候尚早, 結果我倆可以獨霸一隻船. 到達Saphan Taksin站, B又俾river cruise既人截住介紹, 見時候尚早結果又一試. 都話曼谷細, 上次去響酒店遇上同事, 今次就響碼頭又遇上同事.

一向忌水兼易暈船浪既我, 遇上呢款遊河船真係可以安心, 一來船夠大, 二來河道無乜大浪, 所以今次我絕無出醜.
今次參加既船河包左一程專人帶去皇宮. 上次黎曼谷已經去過一次. 但既然今次有專人帶住, 咁又唔同.
所謂專人導遊果然係一對一, 呢位導遊係當地一位女孩, 佢好用心講解每一個地方. 完成皇宮後, 佢仲用專車帶左我地去另一所皇室既大樓參觀.

番到酒店, 原來酒店已經幫我地搬左房. 座向係酒店既另一邊, 不過房間其實比之前一間更殘, 好多地方都已經損壞.
你睇門口盞紅燈似唔似架步?

麻甩飯

2010-01-27T00:05:00.000+08:00

之前有網友嚴選大家最喜愛既"麻甩飯", "麻甩飯"一般泛指男人尤其麻甩/地盤佬所喜愛既飯盒. 結果我揀左枝竹火腩飯.
原因: 枝竹比豆腐更有咬口! 哈哈!

第四類病人

2010-01-25T00:30:00.000+08:00

荒謬影話: 兩個莎姐

2010-01-10T19:55:00.002+08:00

Sandra Bullock舊年發狂推三部片, 結果爆大冷The Blind Side跑出. 其餘兩部喜劇就無咁好彩, 其中"All About Steve"更加仆到直晒, 成為今年Fox十大爛票房之一.
"The Proposal"則比較算做易入口既一部, 尤其一開場惡波士型像確係震到個場. 可惜當佢發現自已個秘書竟然係有錢到哭既富家子既時候, 之前既惡波士型像完全唔見哂, 變得卡通有D老尷. 劇情亦變得拖得一時得一時. 所以我會比較喜歡另一個結局, 黎得比較直接了當, 唔似而家又有個office老尷位. 當然911之後, 好多飛機上既場面變得一定政治正確, 所以另一個結局或會對另一D人不安.
"All About Steve"完全係爛! 由角色設定到場面安排根本就完全錯哂, 甚至懷疑莎姐同片廠高層點解可以向呢個劇本開緣燈. 女角作為一個宅女, 一開始對其他人迴避不信任, 但又竟然後尾可以溶入其他人群之中, 如果話佢係有妄想症呢個又或者可以成立. 男角衰多口令女角誤會, 打搞左觀眾一百分鐘, 但結尾竟然一句話就開脫, 又會唔會兒嬉左? 男記者多番向女角作弄個意徒又係乜呢? 兩場電腦特技大場面竟然無乜令劇情推進, 就更加令人突眼. 難怪呢套戲原本2008年延遲到2009年先推出, 我諗如果唔係莎姐, 相信一早淪為成DTV, 上架了.

兩傻遊曼谷 2009 (二)

2010-01-09T13:01:00.008+08:00

當地導遊出現, 起初我仲以為榮幸到某當地代言人做我地導遊帶我地潮遊泰國添, 原來人有相似物有相同, 笑了.
因為時侯尚早, 酒店仲未有房俾我地, 所以第一站導遊帶我地去全曼谷最高既餐廳食午飯, 因為間餐廳都係對外開放, 當地人都會幫襯, 諗唔到我地可以咁快融入當地生活. 食既係自助餐, 不過質素就真係麻麻, 只及巴西燒烤既質素. 不過可能見有遊客又係聖誕節, 所以即場有小丑表演. 而且因為窗外風光更吸引, 就算D野唔多好食, 眼睛已經飽晒. 可惜經過咁早起身旅程又咁長, 睡魔都開始急call. 眼見所住既酒店只係兩個街口遠, 心諗都應該好快番到酒店大覺瞓. 但呢個想法實在太天真, 響塞車塞到哭既曼谷, 唔好講兩個街口, 一個燈位都可以叫你等十分鐘. 結果我地兩點半由餐廳出發, 四點半先番到酒店, 足足塞左兩個鐘. 想響車上瞓, 導遊又講唔停, 巴士又熱又哂, 根本瞓唔到. 慶幸番到酒店再要等成半個鐘先拎到房, 上到房已經五點幾, 諗住都應該可以昏迷五六七個鐘卦, 咪住! 六點出發食晚飯! 即係只可恰恰咁又要出發.今次入住呢間都算係一間開左一年既五星酒店, 今次房間座向水門區, 樓下反而見到一個廢墟, 唔多唔少有少少反高潮. 房間尚算新淨. 不過配套確係失敗, 響網上已經知佢地既浴室用品未必齊, 咁我一入房見無沐浴露又無洗頭水只得枝lotion, 我就打落去要求補給. 一陣間有人拎過黎, 一開門只見佢拎左兩條毛巾, 我話: Sorry we need shower gel, not towel. 佢又將毛巾塞俾我就轉頭走. 直當我心諗佢地實在太強勁之際, 佢又番轉頭, 仲拎一套四枝俾我. 咁得意既? 我地都唔理得咁多即刻上床休息下, 唔夠45分鐘又要出動.
作為一間大型五星酒店, 樓層又咁多, 住客亦都會好多. 但唔知點解全酒店就只有四部升降機去服務廿幾層既住客同餐廳顧客, 如果每部升降機都好似公屋接駁lift咁大部咁又唔係問題, 可惜每部升降機只係普通size, 結果用10分鐘等lift成為往後每日必要既動作.
是夜被安排到Banyan Tree酒店吃晚飯, 諗唔到Banyan Tree都要淪落到做團餐. 今次又係響五十幾樓食飯, 窗外夜景一流, 食物反而又普普通通. 酒店安排一班後生仔同我地唱聖誕歌, 一班團友細路似乎失儀在場喪哭同班後生鬥大聲, 班父母又似乎睇唔到有問題任班細路繼續爆喊, 後生仔啞忍將隻歌唱完立即走, 我地同另一對年青夫婦互望失笑, 老尷到死. 至於D食物, 見尾圖似唔似大家樂套餐? 笑.食完仲唔暴走避開班細路, 上車番酒店途中導遊問有無人去按摩? 嘩! 黐線! 今朝五點醒到而家足足十幾個鐘, 仲出去按摩? 堅決唔做玩足24小時既港燦, 番酒店大覺瞓.
點知瞓到十一點半, 距離上床時間只係兩個鐘, 强勁既Disco音樂又將我地嘈醒............直到凌晨三點.

兩傻遊曼谷 2009 (一)

2009-12-29T19:15:00.005+08:00

決定今次旅行都用左前後兩個月, 原本想去日本新加坡, 但前者日圓高企後者都係留番明年聖淘沙既環球片場開先至去.
自從四年前一次恐佈經歴後, 對曼谷確係有介心. 原本都係想搵番康泰既自遊行, 但每次經過想報名, 分行都係多人到不得了. 結果今次搵左另一間, 佢地亦有類似既自遊行. 不過呢間既package就包五星新酒店, 航班亦可以升級上商務客位.
不過航班時間就超早, 唔想凌晨時間就出發到機場, 對策就係去機場酒店瞓一晚. 因為近假期, 今次機場酒店就要迫住你買貴package, 可惜其餘兩間酒店完全唔近機場, 唯有迫住就範.上次入住機場酒店因為住內園房所以都唔覺間酒店咁大, 今次住面對停機坪房間就要行一大段路, 由電梯大堂行去房門都要成兩分鐘, 認真誇. 個酒店package包左一個自助晚餐, 上次食已經係普普通通, 不過今次有驚喜, 或者可能我地肚餓, 所以覺得份外好味. 選擇多左, 尤其個麵包布丁真係無得彈. 可惜第二朝要早起唔可以食得太飽.酒店房對住停機坪, 算做少少驚喜. 之但係諗起第二朝要五點起身, 真係攞苦黎辛.原來機場朝早五點幾都已經好繁忙人多, 或多或少因為假期航空公司要求旅客提早到機場. 終於辦好登機手續, 又要趕返酒店沖個涼食個早餐再check out埋又要趕番去機場. 時間啱啱好, 一行到閘口就話登機.咁大個仔第一次搭商務客位, 雖然唔係最新客位設計, 只係地區性商務客艙, 但對我黎講確實好新奇. 可惜以為上左商務艙就可以避開爆喊細路, 點知都係唔得, 仲要被佢地包圍住, 繼續爆喊. 今次坐響中間第一排, 飛機一起飛艙前突然一聲巨響, 我仲以為唔係咁啱又遇上有事嘛? 見班空姐又好似好振定, 我估應該無乜事. 但見地板有白色液體向我腳底流埋黎, 我問空姐發生乜野事, 原來只係起飛時雪櫃彈開, 成枝奶飛左出黎爆開, 所以"奶流成河". 雖然空姐立即清潔, 但我仍然要踩住濕到標奶既地板.曼谷新機場好似真係好大, 但似乎真係唔user friendly, 入境大堂有一大班旅客等緊入境, 但頭頂天花竟然有人做維修, 雖然有假天花但竟夠膽跌工具落假天花, 嚇死班旅客.

30碗

2009-12-29T18:53:00.001+08:00

笑鳥...
(轉自:tvg)

兩傻遊曼谷 2009 (前言十野談大結局)

2009-12-28T22:30:00.004+08:00

1) 今次去曼谷既駛費應該可以同上次去北海道有得揮!
2) 咁大個仔未試過坐飛機既商務客位, 今次一試, 愛上了!
3) 以為上左商務客位可以避開爆喊細路, 點知整鬼依然遇上, 仲俾佢地包圍添.
4) 一起飛就已以為遇上空難, 好彩只係小問題, 不過就"米青成河".
5) 富豪機場酒店原來真係好大, 我由電梯口行去房門我用左兩分鐘...
6) 曼谷果間所謂五星酒店, 地點係優越, 可惜只開業一年, 成間洒店就損耗得好誇, 房入面可以話係溶溶爛爛.
7) 曼谷塞車好似嚴重左, 第一日我地已經用左三個鐘響塞車.
8) 去左一次文華東方, 簡直係世外桃源, 話過下次一定要入去住番一兩晚.
9) 港人依舊失禮, 做盡所有恐佈核突事, 例如自助餐上逐樣野拎黎聞.
10) 曼谷新機場真係....唉, 仲差過舊機場. check in好似打杖走難咁.
大結局) 曼谷依舊有好多好野食, 好多你好想入既舖頭. 但至少下次我地會自遊行(今次都算半自遊), 坐中午機去, 同埋住遠離鬧市中心既酒店, 咁就perfect.

荒謬碟話: Silent Movie 默片

2009-12-20T23:19:00.003+08:00

原本只有呢套戲既VCD, 之前本地發行商一口氣推出Mel Brooks四部舊片BD, 當然一個唔客氣全部入手.
故事係講過氣導演為左拯救快被收購既片廠, 竟然孤注一擲搵一大班大明星去拍一部默片. 電影大半部份都就落響搵明星既過程. 最過癮係成部戲都係默片, 一句對白都無, 全用字幕交代.
Mel Brooks拍呢部戲既原因唔多唔少因為之前佢幫華納拍既"Blazing Saddles"遭到華納高層形容為低俗而離開華納轉投霍士. 佢就用呢部戲去挪喻華納高層, 就算拍部默片都票房口碑兩嬴.

mk味

2009-12-19T14:00:00.002+08:00

話人係mk唔多唔少有貶意, 諗唔到有公司出mk風味薯片, 會唔會晌mk大賣呢?

生活炒雜碎(第十五回: 看圖作文)

2009-12-12T18:40:00.003+08:00

公司年年都會出公司月曆送俾人, 舊年果盒朱古力真係玩死人. 今年終於用番少少腦, 用"wet floor"告示牌變成月曆, 好鬼sharp醒.
############################################舊年迷上食米線, 差唔多一個星期梗有一兩餐晏晝食米線. 唔知係咪咁公司附近突然開左幾間米線專門店, 其中一間仲玩會員制吸印仔. 食滿20碗就送一碗, 結果同事一呼百應下, 一個月內已經送左兩碗免費米線. 呢間叫"樂林"(我笑住話係咪羅樂林開架?), 質素唔差, 幾有水準添.
############################################同事farewell, 以往只識去飲茶, 今次新人事新作風, 拉大隊去Outback食lunch. 原來Outback有set lunch, 都係六七十蚊有湯有沙律仲有野飲添! 確實比晚市經濟. 叫左個澳坊漢堡, 大份到無輪, 抵!
############################################
舊病復發, 過去果兩個星期確實好辛苦, 乜野都做唔到. 再加上無厘頭身患怪病, 走左去做兩次小手術, 就更加令我情緒低落.
黎緊聖誕我地落實出門走走散下心, 希望對我有所幫助.

荒謬影話: Chef's Special

2009-12-06T18:03:00.003+08:00

西班牙既同志喜劇絕對遠近馳名. 呢部"Chef's Special" 甚至係賣座冠軍! 中年同志廚師失婚後埋首打理馳名私房菜, 身邊圍住一班古靈精怪既伙記. 直到有一日, 屋企黎左一個新鄰居, 生活就開始變化. 跟住前妻離世, 佢地一對子女又要由佢照顧, 再加上佢既"發情"伙記對佢既新鄰居想入非非, 佢根本就簡直無時停.
成套戲就正如男主角既生活, 情節異常豐富, 笑位同感動位都相當充實, 確實係近年算做好好睇既同志片.

荒謬影話: The Boat That Rocked aka Pirate Radio 出位樂人谷

2009-11-30T20:11:00.001+08:00

講真一聽到係Richard Curits既新作, 絕對係超級期待...就算之前睇trailer吸引係零.
但睇完整部135分鐘既電影, 完全明白近期呢部戲響美國上映時票房可以係咁差, 甚至乎全球票房都差到無朋友.
可能之前"Love Actually"既All-Stars效應令佢被推到上天, 今回整部電影空洞得靈魂, 貫穿全片既流行曲絕對一流, 但故事性弱到不得了. 估唔到之前寫過不少佳作既編劇可以寫出如此空洞無物既劇本.
也許佢都只不過想得個情懷而無需要太多, 但就白白浪費片中各演員.
片首既120分鐘空洞鬆散都算, 至少有停不了既好歌支撐, 但尤其片尾竟重演鐵達尼式悲情, 到呢一點, 成部戲已經完全失控.
相信Richard Curits下一部"Lost of Words"(如果真係開得成既話....)真係要求神拜佛, 否則連愛情片呢條line都仆既話, 真係可以喊三聲.

一個星期兩餐感恩節大餐: 一餐係, 一餐唔係

2009-11-29T15:29:00.003+08:00

感恩節對於B黎講簡直一個大節日, 只係謹次於聖誕. 所以早響一個月前佢已經好緊張咁叫我搵定地方食感恩節大餐. 可惜響香港可以食到感恩節大餐既地方少之又少. 終於俾我搵番尖沙咀既Main St. Deli仍然有供應, 可惜我又眼大睇錯野, 以為可以提早食. 足足早一個星期去左果度食, 但當我地一坐低先發現原來堂食只會響正日供應, 但外賣就會提早供應. 既然去到, 都係照舊幫襯.佢地有個combi都幾抵食, 兩百零蚊有湯有主菜. 始終係酒店野, 味道都非常唔錯.為左補償番B, 都係幫襯番"肥佬". 今年加到每位二百五, 可惜我地一坐低, 我又唔記得左之前既教訓, 又係一叫就叫左兩個餐. 結果一上檯, 真係暈, 大碟到失控. 飽到爆開仲要食唔晒要打包~

他/她的滄海遺珠精選

2009-11-21T19:15:00.004+08:00

兩年前, Sony BMG宣報推出收錄兩間公司(其實仲有星光/藝能既歌曲)歷年經典既5CD精選, 可惜爛尾收場. 兩年後公司併購完成正名番為Sony Music, 響唔覺眼之下又推出兩張舊歌精選. 呢兩張所謂"他/她的滄海遺珠精選"跟之前5CD精選有點類似, 但作為"滄海遺珠精選"就有少少誤導, 我諗所謂"他/她的滄海遺珠"都只不過算係兩三線或one hit wonder既專輯.
例如SONY系既蔡興麟陸家俊傅振榮李中希周永恆, 除左一首"為了妳為了我"因為家駒而熟悉, 相信佢地對大家都好印象蕪湖. BMG三子既土歌"Home Alone"不幸再次收錄獻世實在幾令佢地不知所措. "陽光空氣"完全唔算"滄海遺珠", 當年此曲極之流行, 放響呢度實在尴尬, 不過亦都多謝令呢隻歌再見天日.呂珊響女子果邊竟無歌上榜, 反而響男子呢面分得半首, 又係尴尬.
女子組果面選曲又係古怪, "是不是這樣的夜晚, 你才會這樣的想起我"同埋"甜蜜如軟糖"都係紅極一時既歌曲. 反而又係SONY系既王秀琳(Mango??)彭海桐李玟既出現有少少驚喜. BMG系除左黎瑞恩唯一響BMG既歌"問候"必定出現, 當年俾人睇低既吳君如亦榜上有名, 實在高興.

my pick:
西飛客機 - 戴蘊慧
是不是這樣的夜晚, 你才會這樣的想起我 - 彭家麗
多得你放棄 - 吳君如
在我心中有你 - 馬怡靜
口不對心 - 劉小慧
陽光空氣 - 威震樂隊
美麗的謊言 - 蔡濟文

You Must Remember This : The Warner Bros. Story

2009-11-16T20:15:00.000+08:00

如果問人最能代表荷里活既, 多數人都會答MGM美高梅又或者華納. 唔多唔少都因為兩者都製作過好多經典大製作. 85年以來華納兄弟都製作好多好屬於美國既電影, 好多都係好反應時代既製作.
呢部5集既電視製作為大家回顧由第一部有聲電影" Jazz Singer"開始講到近代"Harry Potter", 每一階段華納兄弟製作既變化. 每一代都有一部戲可以代表果陣時既社會.

Roland Emmerich公式的2012

2009-11-15T19:27:00.004+08:00

由I-D 4開始, Roland Emmerich已開始將呢個公式照套落佢既災難片中, 由離婚夫婦 => 主角係某方面專家 => 拍檔犧牲 => 全世界化險為夷.
原本我期望結局係冚家剷全球玩完, 可惜係佢公式之下又係黎個happy ending. 反觀之前大爛片"Knowing"就玩得甚徹底, 擺明地球完蛋要跟番聖經他處重生. 今次方舟又係聖經但又唔係太hardcore兼玩荷里活式拖時間, 反而招數甚低.
今次仲用上數碼攝影機, 可惜響昏暗同埋動作場面, 缺點走晒出黎, 殘影閃礫出齊.
作為災難片, 158分鐘實在太長, 尤其中段偶有悶場, 死唔斷氣既對白拖慢左唔少節奏. 最重要今次明顯添衝著中國市場, 中國突然變成救世主, 反而美國就面目可憎. 至少please到中國十幾億人, 票房可想而知. 唔知以後仲會唔會有呢種pro-beijing既荷里活電影出現, 作為美國最大既債主, 中國又知唔知俾美國抽左水呢?
知道佢地拍緊電視版就由佢地響南非重過新生活開始, 但講真仲有乜野好講?

金鷹朱古力

2009-11-09T00:06:00.002+08:00

行行下永旺超市俾B捉住, 原來又係試食, 仲要試朱古力! 個英文名咁熟既? 問阿姐: 金鷹朱古力?
阿姐話係呀, 好耐歷史勒! 我同B都話呢個係我地少年回憶!
如果70年代屬於金杯, 90年代屬於金莎, 咁80年代係屬於金鷹朱古力.

超難食: 新一派

2009-11-08T23:44:00.004+08:00

為左趕住去旅行社搞聖誕大旅行既準備工作, 所以事旦搵個地方食晏. 坑口呢間"新一派"開左咁耐都未試過, 點知一試就乃野.
叫左個炒公仔麵, 20分鐘都未見影, 連B個燒味飯都就快食完, 好困難地叫位姐姐埋黎問可唔可以幫我跟單. 10分鐘過後見對面檯遲黎過我地成10分鐘但都已經有炒公仔麵食, 點解我既都未見影? 又叫位姐姐幫手跟單. 足足直到第35分鐘, 碟麵上檯.
食左一啖, 簡直要噴麵. 話就話黑椒炒公仔麵, 但咸到好以用左成枝生抽咁, 兼且完全無黑椒蹤影. 咸到咁簡直係謀殺, 咁飲杯凍檸茶沖下咸味, sorry, 杯凍檸茶又甜到爛牙.
究竟發生乜嘢事? 如果你想快D死, 請幫襯"新一派".

林建岳先生, 請你救救楊千嬅

2009-11-01T14:58:00.002+08:00

林先生,

你知唔知楊千嬅出左碟? 係, 佢係響接近零宣傳之下出左新大碟. 作為貴公司旗下子公司既一姐得到如此"厚待"實在有D唔明.
楊千嬅響A Music三年既成績相信大家"有目共睹", 大碟內歌曲質素每況愈下, 停不了既楊小姐與黎先生既爭拗傳聞, 根本就係令楊千嬅呢幾年成績毫無進步既主因.
林先生, 請問你有無聽呢楊千嬅呢隻新碟呢? 主打既三首歌: "真命天子"確實係有D可以食住結婚條水, 比起同碟或之前兩張內任何一隻歌已經算可以收貨. "我在橋上看風景"就真係聽得出黎先生主導衛蘭式冧歌, 但套上楊小姐身上又唔覺得咁配合. "原來過得很快樂"儘管有個好剎食既歌名, 但全曲根本就無果隻文字上感覺. 往後既"All About Love"算做全碟最入耳, 最易消化既一首, 可惜呢首一早已經plug上台成年, 而家先見街有D過左氣, 呢個係marketing問題定黎先生問題呢? Eric Kwok既"麥芽糖"亦都係隻黑馬, 可惜林若寧有D失蹄, 否則呢首會係佳作. 如果論難頂, "藍風箏" "對木偶唱歌" 如果係衛蘭唱, 或會有更好效果. 但換上楊小姐既話就真係格格不入. "孖公仔"會係另一首黑馬, 一首真正接近千嬅sound既作品, 算做臨尾執番身彩. 相對呢張碟同之前兩張同樣A-Music既製作, 呢張確有接近微塵咁多既進步, 可惜跟之前既相差仍然很遠.
林建岳先生, 我作為楊千嬅咁多年既粉絲, 可唔可以請你將楊千嬅從黎明先生手上拯救番出黎? 就算唔得, 下一張碟(如果佢肯續約既話...)可唔可以由楊千嬅自已作主導製作一張屬於佢自己既製作而唔係一張黎明大碟呢? 否則楊千嬅既演藝生涯只會死響黎明手上.

粉絲安記上.

兩傻遊大嶼山

2009-10-26T14:17:00.004+08:00

我倆都好希望有個long weekend, 今個月終於恨到, 但三日假期去得邊? 番大陸, B既簽証費真係貴到突眼. 去澳門又唔係好想. B話不如去試下"昂平衫碌鈴", 基於B希望見郊外多過見城市, 所以決定重返銀鑛灣! B就係鍾意梅窩果種寧靜, 但問佢如果長住呢? 佢又唔制!今次又再住銀鑛灣酒店, 七百幾蚊一晚住新翼包早餐同幾年前差唔多, 只不過連新翼都老化得好緊要, 睇黎下次住舊翼就算. 之前有blog友話呢度既自助餐有進步, 今次我見週末價廿百到尾再見晚飯時間都係人跡罕至, 就知有幾好! 始終梅窩唔係南丫長洲, 無話有大量靚海鮮酒家. 只有近碼頭既大排檔, B對大排檔既畏懼所以唯有另找地方. 有一次去左間叫"羅馬餐廳"食左個頹飯, 今次就試左隔離間意大利餐廳. 伙記疑似意大利人, 就連顧客佔左8成係外籍甚至非英語人. 因為B抱恙所以只叫左兩個主藥, Roman薄餅, 個薄餅底厚但異常地脆. 牛肉闊麵, 咸牛肉應記一功, 再加上無亂加茄汁, 食到我地想再encore.住酒店食早餐就好難預會好食, 但去到咁難食就真係更難遇到. 除左生果可以得一分, 其他同食屎無分別. 最正係個咖啡, 根本就係雀巢即溶.... 食完行左一陣沙灘趁未有船到岸已經雞咁腳check out上去寶蓮寺. 成架巴士就得四丁友上大佛, 巴士公司真係俾車搶咁多生意?
上到寶蓮寺原來巴士總站搬前到市集, 要入寶蓮寺就要行多兩步入去. 我地一去到已經即刻走入齋館, 因為個早餐太"屎", 我地無乜食過野, 我除左食左少少炒麵加兩條腸就喪食生果. 所以呢餐齋簡直係救命飯. 不過食呢個每位一佰豪華齋, 份量又真係大得驚人. 二人餐竟有四餸一湯, 份量仲一D都唔細. 不過味道又出奇地好, 食食下又食得哂.
寶蓮寺及大佛去得太多次, 所以今次無再深入探討, 所以去左隔離個市集. 呢個比山頂廣場更差既遊客市集根本同寶蓮寺真係好格格不入, 就算入面有好多買佛家紀念品既商店, 講明有大師開光, 但再加上隔離有齊星巴克海天堂. 咁同將旺角老銅有乜分別?
同B入左去其中一個景點: 與佛同行. 原以為只不過係個展覽, 點知... 竟然係播一大段卡通再加埋好多機械特技. 跟住有位小姐帶你行一大段路又播一大段卡通跟住再帶你去"高科技"祈福許願. 講真... 真係好搵笨!見B唔係太舒服, 就拿拿臨落山. 之前已經響網上訂左纜車飛, 原以為只有站外一條短短人龍, 點知行到站內, 簡直係重現三十年前羅湖過境萬人空巷場面. 站內原來已經排左幾百人, 結果我地排左足足45分鐘先上到車. 但係上到車又係另一番滋味, 尤其一出站同埋經過第一個轉折站落山一剎那真係幾驚心, 好彩B有畏高所以無搭水晶車廂, 否則仲驚!

荒謬影話: 12 Rounds 血戰12關

2009-10-25T18:54:00.002+08:00

之前WWE出錢捧旗下"打仔"做大電影明星既製作, 通常都落得摺埋又或者淪為DTD(Direct to DVD)收場. 今次John Cera又黎再加大導演Renny Harlin兼名監製Mark Gordon助陣, 理應就算主角演技差, 幕後再加劇本可以幫一把. 可惜大家今次又一次搭沉船, 甚至乎Fox因為連續幾部都蝕大錢所以索性關閉旗下既Atomic部門.
呢套戲既致命傷除左男角演技真係差到無朋友, 場面熟口熟面兼製作粗糙都佔好大主因. 劇本反智已經算數, 但睇到中段就覺得呢套簡直係動作片精選, 有齊各大有名動作片場口, 由Die Hard 3式越城追逐到Speed既電梯槽加巴士追逐場面, Spiderman 2徒手整停電車場面, 結尾再加個誇到飛起A Long Kiss Goodnight式跳機場面, 全數熟口熟面. 再加上唔知係咪因為製作費太低, 還是Renny harlin之前拍過幾部爛片, 所以有個別場面出現好多可以避免既穿崩位. 飾演奸角既Adian Gillen似乎未夠之前佢響Queer As Folk時果種邪氣甚至連佢響成龍Shanghai Knight既奸角氣質都無.

給自己的信

2009-10-18T18:25:00.002+08:00

B的母親上月離世, 離世之前幾日B仲仍然同母親商量傾過電話, 但諗唔到兩日後就一睡不醒. B悲痛之餘仲要應付隨後既爭產風波, 佢突然有日拉我入房, 將銀行,電郵密碼交俾我, 話如果佢有日突然有乜野事, 到時都可以動用戶口內既錢, 亦可以用佢既email通知佢既朋友同親人.
呢兩日到我病左, 突然諗起要是唔係B走先, 而係我走先, 我又無對佢向交代一切, 到時會點呢?

假設... 我真係一睡不醒. 我希望B會代通知大家我既離世. 或者我父母未必俾B出席我既葬禮, 但都希望我父母可以對B再好D, 或者B可以代照顧我父母.
我亦希望B可以令梅玲及msl繼續落去.
我希望我既葬禮上, 可以播"再見二丁目"和"給自己的信"兩首歌.
朋友不要哭, 只要記住我既笑聲同傻勁.
或者我既父母覺得以往都係錯.
都四十歲人, 已經無乜需要交代.
或者一睡不醒可以看得更清.

富豪東方酒店

2009-10-11T14:13:00.005+08:00

B前兩日要求: 今個週末出街試D新野得唔得? 咁又係, 個個星期唔係太興翠華就係美心稻香確實有D悶. 打開"開飯"搵呀搵, 終於得出幾個點子: 入西貢/去南洋................酒店試石頭燒/富豪東方試平野. 率之富豪東方同西貢勝出, 逐日出發, 首先第一站富豪東方自助餐.
啟德機場未搬前, 對呢間酒店確實好好奇, 好希望入去幫襯下. 結果機場搬左都無入過呢間酒店. 今次見網上食家對呢家野既自助餐不過不失, 而且B鍾情富豪系酒店既自助餐, 都不妨一試. 再加上網上有七折coupon任下載, 更加吸引.
當然網上話打電話去呢間酒店訂座仲難過訂演唱會飛, 果然所言非虛. 打左成個鐘都係打唔通, 唔通真係咁受歡迎? 突然諗到打去總機轉駁, 結果2分鐘內駁通.
個場座落地庫, 面積幾大, 但都只不過七成滿. 安排入座後當然係"巡視一周"有乜好野. 攤位主要貼牆圍住一圈, 比富豪香港無咁迫, 甜品就放左響另一邊近後門.至於食品種類跟其他富豪系既自助餐近似, 只不過唔會好似富豪香港果面有班細路主攻雪榚當正餐, 呢面班細路主要係黎玩周圍走.沙律選擇比較少兼大路.呵呵!! 馳名蟹腳!! 但呢面D腳好.............瘦, 無乜肉.羊扒都係瘦但味唔錯, 牛肉卷亦都不過不失, 但最正係個炒雜菌同埋薯蓉, 好味到要encore.羊扒都encore不過越拎越細條. 燒牛肉好味, 但都不及個咖哩雞咁正! 不過呢面個印度薄餅凍得滯, 好難食.碗仔翅!! 我寧願飲個淨湯算...Home Made梳乎厘, 即叫即造, 可惜趕住咁整, 所以唔知係乜. 相對甜品檔, 蛋榚款式好少, 都係得幾款. 不過有部和夫機, 可以自助整和夫, 不過自己呆等兼出力兩分鐘先整到件, 真係幾蝦細路.埋單五百幾蚊仲有即場抽獎添! 結果抽到一百蚊餐券下次用(!!??). 五百零蚊黎講都算ok, 至少距離屋企只係20分鐘車程, 比過海比較方便. 但係比同系酒店, 香港店甜品比較多選擇, 機場店因為人跡罕至, 唔會同人迫, 可以慢慢揀, 選擇都比較多. 不過機場同東方呢兩店既招呼確係九流, 你可以食到層層叠都唔會有人收野.

有無咁貴呀?

2009-09-29T00:02:00.003+08:00

話說星期五晚出街食飯一樣係好難搵位, 行過美心稻香等位等到我心"胶"痛. 先諗起商場新開左另一間酒樓, 去到仲要無痛任坐, 已經覺有D乃野!
餐牌上賣緊普通野但收緊天文價, 亦有鮑參翅肚賣緊街坊價, 我亦覺有D乃野. 唯有叫普通野: 一吋骨, 一碟三大枝炸排骨. 排骨肥美但肉俾粉"處理"後失色. 翡翠白合炒帶子, 實質係白合荷蘭豆炒帶子. 大佬, 呢碟野收我百二銀???
唯一可取係個老火湯, 真材實料, 價錢合理.
埋單連加一竟要三百三!!! 突然我覺入左黑店, 似乎我食左好多入面既靚裝修. 最嘔電係個"鮑參翅肚"套餐一樣都有翡翠白合炒帶子, 兩位用只收三百八.
找錢時送我幾張燒乳鴿券, 每人半隻(!!??), 我頭也不回, 無下次.

一年梗要豪一次

2009-09-28T23:56:00.002+08:00

至愛既半島酒店月餅!!
較早前亦試左美心朱古力味冰皮月餅, 感覺唔錯.

邊度都有蝸牛

2009-09-27T04:13:00.001+08:00

自從幾年前搬入將軍澳後, 見得最多除左係狗同埋一班唔著衫跑步既男人外, 就係蝸牛. 直頭係周街都見, 甚至屋苑平台都會見佢地既蹤影.
呢晚見到呢隻巨型蝸牛響屋苑大門口前爬緊, 好驚有人唔小心踩到, 我就好心將佢移到花糟旁, 點知有港女見我手執巨型蝸牛竟驚叫逃跑. 唉...

錦"繡"雲吞

2009-09-26T16:00:00.004+08:00

當你點菜時睇漏一個字, 真係要付出代價.
某日一班同事出外食飯, 見點心紙上有"疑似"錦鹵雲吞"就隨手一畫. 點知點心一上檯, 甜酸醬換成又有雜果又有西米既沙律醬. 是旦捉位阿姐一問: 有無甜酸醬? 阿姐答: 錦"繡"雲吞係點沙律醬! 大家即刻再望望點心紙先知上檔!
成圍檯都無人敢試, 我唯有身先士卒做白老鼠, 淨食雲吞還可以, 但配埋個沙律醬... 十個嘔! 西米沙律醬?? 食完真係叫聲:[ ]佢個街...

寶記3EP系列

2009-09-20T14:23:00.003+08:00

仲記得以往黑膠年代, LP或者12"Single都係主導左市場, 直至有一年寶記推出一張叫Maxi-Single簡稱EP既產品, 一碟四隻歌, 比12"single兩首歌更吸引歌迷, 價錢又可以賣貴10蚊. 從此12"single市場過渡成EP, 但初時呢類過渡產物通常原本只計劃出single, 結果為左遷就EP格式就硬加兩首純音樂伴奏版落去充塞時間成為四歌一碟. 直至近年CD世代, EP已經不只有4隻歌, 多至6, 8首歌都叫EP.
環球近日推出寶麗金年代既12" single/EP復刻版, 以套裝發售. 有好多蒼海遺珠都終於首度以CD型式發行, 尤其"方心美", "蔣志光"甚至達明一派首張EP都罕有咁重發. 而且發現好多隻音質都非常唔錯, 絕對係值得收藏. 遺撼因為版權問題, 以往寶記既PHILIPS廠牌唔能夠再用, 變成封面同碟面既廠牌位都漏空左. 同埋製作上又係好大意咁將所有12"single都印成33 1/2轉而唔係45轉.

露雲娜

2009-09-13T11:58:00.002+08:00

冷靜D!! 我唔係要講周小姐. 我真係講緊7/80年代既一度好出名既女歌星露雲娜.
自問我呢一代剛好感受及經歷過佢既最紅既年頭, 由英文歌轉型到廣東歌市場, 一首"荳芽夢"真係唱盡當時學生妹既心聲. "傳說"更加令由細路到大人更認識呢位小妹妹.
後期抒情既"情像外衣","飄忽的愛"更加表演出佢成熟既一面.
較早前環球終於推出露雲娜尾二果隻大碟既復刻版CD, 亦令我拎番呢隻露雲娜87'出黎番聽. 當然唔少得近日網上熱播佢響寶麗金15週年演唱會上既演出, 雖然那個年頭演唱會錄音多數再經錄音室混音甚至重錄, 不過見露雲娜完全接近完美演出, 都叫而家呢一代年年開演唱會但又次次走哂音既歌星汗顏.

Outback一巡

2009-08-31T20:28:00.002+08:00

好彩一早訂位, 周六都好多人.
是晚有位陽光大隻男trainee招呼我地幾檯, 後面檯一班mk女開心到收唔到咀.

咁又十年

2009-08-29T12:56:00.003+08:00

終於奉上九百銀更新個駕駛執照
拎左駕駛執照15年, 只揸過一次車咁大把, 仲要唔係響香港.
你會上我車嗎?

BD 愛漫遊: Starman 天外情

2009-08-22T16:55:00.003+08:00

呢部片B一直推崇為超級傑作, 可惜一直搵唔到黎睇. 前一排youtube推出網上免費電影, 呢套戲榜上有名, 不過只可以響公司既電腦先睇到(美國IP), 所以睇左一陣又無繼續. 慶幸終於推出藍光碟, 可以一睹呢部戲.
故事簡單到一位外星人黎到地球考察但因為太空船損毁要去另一個地點搭另一艘太空船離開, 中途遇上女地球人沿途協助佢. John Carpenter並無將部戲大玩特技驚嚇, 反而著重左響感情線上.
呢張BD既畫質實在比較普通唔算突出, 近來SONY所推出既舊年BD大多數都未見有remastered, 有D浪費左BD既特質.

初試Burger Mix

2009-08-17T14:33:00.002+08:00

公司附近以往有間幾好味既熱狗店, 所賣既熱夠及長通粉都好好味, 可惜兩個月前突然結業. 今個月初, 上址又開另一外賣式漢堡飽店, 再睇埋某新聞節目, 原來係有大學生學習創業實習既機會, 再者見舖前日日人頭湧湧, 決定搵日試試.
今次試左個手打牛肉漢堡, 單睇個飽既份量已經有睇頭! 一望之下牛肉好似好乾又唔厚, 而且亦唔見太多醬汁. 但一咬落去完全明白哂. 有肉汁, 唔厚亦令唔太難食. 醬汁適中, 配料略欠. 薯條就算外賣亦都仍然脆. 套餐$31湅飲仲可以揀其他梳打特飲.
不過食完個飽既半個鐘後, 我既"味精反應裝置"又再啟動, 甚至乎係老麥咁既級數! 唯有不停灌水.

S小姐重臨香江

2009-08-16T17:59:00.003+08:00

記得上次S小姐一見我呢個表舅父就當左我係歡樂天地擒上擒落直頭莫斯科馬戲團上身. 今次明顯大個女, 有番少少自己主見. 好似我地一家全程廣東話對白, 唯獨佢要求媽咪用番荷語翻譯, 但媽咪又唔肯, 雖則佢識聽又識講廣東話, 但堅持全程荷語交代, 好有性格. 但最後抵唔住頸, 佢都係爆左幾句廣東話, 笑了.
(S小姐堅持自己將對眼"打格")

Subway @ Quarry Bay

2009-08-08T16:17:00.003+08:00

公司附近食晏, 講真選擇又真係幾多. 由平到震開既廿二蚊燒味雙拼(平兼好好味!)到又貴又難食大家樂super sandwiches同Deli France. 亦可以有意泰日台各式餐廳選擇.
繼之前附近商場開左健健康康既吉野家牛肉丼後, 原來另一間都幾健康既三文治店又會登陸!!(仲要開響平平燒味飯既對面!) 唔知幾時有埋"堡加敬"呢?

BD 愛漫遊: Midnight Express 午夜快車

2009-08-03T03:20:00.002+08:00

Alan Parker既經典除左The Wall之外就係呢套. 當然Brad Davis既忘我演出同埋Giorgio Moroder既超勁配樂造就左呢部戲成為20世紀既經典之一.
遺撼既係Oliver Stone既亂咁黎改編, 亦因為當年因為片廠喜好, 將男角及故事"抝直", 將一切有關男角既基情節刪改. 再加上極多煽情暴力場面, 令到土耳其要禁映呢部電影.
原以為30週年片廠會remaster整部電影, 結果呢張BD反映出係效果麻麻. 但特別收錄就確係值得一睇.

BD 愛漫遊: The Towering Inferno 沖天大火災

2009-08-02T22:57:00.001+08:00

70年代荷里活曾經好流行災難片, 由大地震到國際機場再到海神號, 無一死傷無數只救得一兩個. 呢一部破天荒兩大片廠合作既災難片, 搵到當時地上最強既卡士, 單係Steve McQueen同Paul Newman已經係近代兩大男星難得一次碰頭. 原以為兩大男星一定難搞兼勾心鬥角, 結果到頭來最難搞反而係女主角Faye Dunaway.
當然1974年既特技好難同現在既CG比較, 尤其當年通常一比一真實佈景兼大火再加巨型模型特技配合, 果種實感已經令CG比下去.
不過, 兩大男星甚少同場演出, 鬥好戲既機會係少左. 好在仲有其他大明星緣葉配襯, 令到全片165分鐘絕無冷場.呢張A區美版BD亦交足貨, 音效強勁而畫質亦都係中上程度. 最重要特別收錄異常豐富, 特輯訪問甚至outtake一樣有齊. 可惜擁有國際發行既華納從未推出過呢套戲既3區DVD(只出過港版VCD), 否則本地更多人可以欣賞到呢部經典. (TCM亦有播過呢部片, 但似乎係無中文字幕)

老麥可樂杯

2009-08-02T13:30:00.001+08:00

兩個月前得知台灣老麥有呢隻可樂杯換, 原本想問台灣果邊既同事幫手換, 但實在太忙最後不了了之. 諗唔到呢個promotion終於黎到香港!!
公司一班女同事口口聲聲一向唔食老麥, 星期四破天荒大家叫左四百幾蚊外賣, 講到尾都係為隻杯. 食完仲話只此一次, 轉過頭星期五又encore多一次.
星期四我食完都覺一星期食多過三次老麥係會死, 係真死! 結果尋日... 我同B又食左次, 又換左兩隻. 個杯確係好靚, 而且產自名牌, 碓係引死人!

Shirley's era

2009-08-01T23:55:00.002+08:00

而家先至講確係有少少過氣, 但未出碟之前關小姐已經自動波報料話呢張可能係最後一張碟, 心諗佢又出呢招?成日怨唱片公司無誠意, 可以俾機會佢製作一張佢認為好既唱片. 但又唔諗下自已既飄忽性格或慣性失蹤, 呢個實在好難可以響呢個市場生存. 你要選擇唱另類歌曲, fine! 但最好都係自資製作, 響香港"商業"市場真係無乜唱片公司會冒呢個險.
但我由佢第一張唱片開始其實已經好欣實佢, 只係多年前佢接連失蹤又不合作. 覺得佢對唱歌事業變得好兒嬉, 完全無進步過.
結果呢張拉雜成軍既疑似新曲加精選, 又係好兒嬉之下推出. 成年前已經派上台既"天規"同"山水", 前者絕對平易近人, 而且remix更加令人聞歌起舞. 歌詞中: "不普通的都失蹤, 普普通通天天相擁, 暖了鏡面被變凍, 寂寞淚承受無用, 何容易怒亦未重, 迷魂奪命淚又洶, 這定理何以命中, 地球為誰在蠕動." 好似完全係關小姐既寫照. "地盡頭"算係另一首較易入耳既作品, 將流浪外地既孤寂感完全表露無遺.
最後, 每次聽"三千年前"既旁白時, 我都想笑. 笑既唔係關小姐或琴姐, 笑既只係對旁白...

Johnny Deep

2009-08-01T15:02:00.004+08:00

呢一邊廂笑史塔肥中文錯字百出, 點知身為傳媒既一份子, 一樣有更經典巨獻!
攝自今期壹週刊品牌特輯內文, Johnny Deep, 賣飛佛. 唔知個客睇完會唔會笑呢?

荒謬影話: Confessions of a Shopaholic 潮拜購物狂

2009-07-26T22:30:00.002+08:00

第一次認識P.J. Hogan既電影算係1994年既"Muriel's Wedding"(港譯:一顆恨嫁的心), 故事及導技都算係一流. 但一到荷里活, 果套"My Best Friend's Wedding" (港譯:真的想嫁你)擺明想食住前水, 可惜劇本不濟, 單靠演員落力堆砌.
事隔六年後再有電影製作, 今次大明星變成配角, 主角反而係二三線姐仔. 故事同之前港片"最愛女人購物狂"亦有相似. 其實"最"片都並唔差, 只係結尾有D拖泥帶水, 拖垮左整體成績.
反而"潮"片亦都出現迫似情況, 只係P.J. Hogan處理得比較走精面, 再加上各位綠葉努力, 先至無令部戲太難睇.
(60/100)

BYOB

2009-07-25T18:31:00.003+08:00

自從實施膠袋稅之後, 確係大家都環保起黎用環保袋購物. 過去一年就算我去買碟都已經要求唔要膠袋, 唱片影碟早已封上一層膠袋(有D甚至有兩層!), 如果再要膠袋就實在太誇張. 但係去超級市場又因為通常會大手入貨, 一兩個膠袋就少不免. 不過實施膠袋稅後, 我就真正要實踐唔用膠袋改用環保袋.
起初一個星期確有D唔習慣, 經常唔記得帶環保袋. 但之後每日番工就記得帶一大一細既環保袋: 細既主要用作買少量貨品例如去便利店或者超市一件起兩件止. 大既主要就用作超市入貨之用, 唔好以為個袋好細, 但原來貨量負重能力都相當不俗.
不過, 我既BYOB就應該係Buy Your Own Bag, 因為大果個係響"胃匡"九個幾購入(無帶另外一個大袋所以迫住買多個), 細果個係B響"首頁"買書時送既.

師林@香港亂噏

2009-07-20T23:19:00.003+08:00

初試"慘仔"米線

2009-07-20T18:41:00.005+08:00

尋日上完果個N97工作坊之後, 行過油麻地見網上聞名既"慘仔"... 譚仔米線, 見唔多人又見少少肚餓, 就決定試一試.
食過好多間米線, 似乎都未試遇到過一間真係好食, 唔係味精超標就係配料求其. 見"慘仔"米線配料有豬潤我簡直兩眼發光. 不過又見其他配料都吸引, 結果唔駛諗叫左個過橋米線餐.個米線一上檯, 真係目定口呆... 好........大..........碗........呀! 簡直係二人前. 我食左一半時心不斷諗: 點解食極都食唔完既?
不過配料唔錯, 再加上可以自調酸辣程度, 非常稱心. 四十零蚊又真係幾超值尤其如果真係二人分享! 下次都係叫個細再加土匪雞翼就算.

Nokia N97 入手記

2009-07-19T20:01:00.003+08:00

話過為左慳錢, 减少買新"玩具". 之不過人總係有籍口去買野, 今次用到皆因舊手電壞左一半, 一年一度自資生日禮物等等, 終於可以用呢D籍口去入貨.
其實一直有諗會買乜野手機, iPhone對我黎講似乎對我黎講吸引減半, 皆因已擁有iPod Touch. 原本都有諗LG, 之不過同事及網友既經驗係會極速壞機, 唯有又放棄.
結果論真實實用性同埋功能, 就只有呢部N97可以勝任. 不過五千幾蚊一部電話又實在有點貴, 經過格價後發現買"台機"會係比較平, 結果只需俾三千幾蚊機價就出左呢部手電.
發現現今好多人買機只為左部機既外型靚而去買, 功能如何都係非常次要. 作為老一派, 我依舊都係寧願功能行先, 呢部N97似乎我需要既功能都有.
都有成六年無用過Nokia既機, 再加上新OS, 真係需要慢慢上手.
1) 比Windows Mobile機更人性化, WM機有時實在好老土.
2) 輕觸螢幕靈敏度比較差, WM一篤就係, 佢就要double click.
3) 一直用iPod Touch聽歌, 用Apple Loudless格式, 但原來N97係唔支援.
4) 相機真心好正, 反應快而且就算用"自動模式"都可以拍到唔錯既相.
暫時只用左兩三日, 我仲係響摸索階段, 等我用多一段時間復再講多D用後感.

領o野

2009-07-16T01:14:00.001+08:00

(圖片來自: 三屋將軍谷)

BD 愛漫遊: Roxanne 求愛怪傑

2009-07-13T14:37:00.000+08:00

呢部電影應該係之前響香港從未推出過DVD/VCD, 只係當年哥倫比亞仲係由香港唱片代理錄影帶既時代出過錄影帶版本. 我都係只睇過一次, 印象唔深, 甚至多年後先知原來改編自"大鼻子情聖".
今次響藍光制式重看此片, 一來BD下全片顏色相當梲目, 再配合片中加拿大翠綠山景, 令到畫面相當突出. 故事基本上與"大鼻子情聖"雷同, 不過Steve Martin演譯既消防隊隊目甚為有趣, 再加上佢手下一班烏合之眾, 令到情節相當豐富. 正如之前Agnes話齋, 現在荷里活好難再會有如此有趣小品出現.

雨後彩虹

2009-07-13T02:33:00.000+08:00

時維六月尾, 做做下野驚見咁大條彩虹晌窗外出現, 下意識拎出相機拍低, 事關拍完彩虹就慢慢消失.

鳳城好貴

2009-07-12T14:17:00.003+08:00

時光倒流番去六月中, 啱啱病好, 為左慳錢一家決定父/母親節一次過搞食好D. 原訂去鴻星, 但細妹話不如去鳳城啦. 我對鳳城無意見, 只怕係對父母黎講有少少寒酸.因為病完精神未及恢復, 連點菜都無心機. 結果重任落響細妹, 佢發板! 叫左個套餐加隻八寶鴨. 一黎碟拼盤...好味呀!!! 大腸海蜇都異常好味, 其他反而普普通通. 最後落到八寶鴨, 鴨瘦但料足. 可惜我對果D填料真在無興趣, 食左兩啖已經夠皮.
埋單竟要千三銀!!! 嘩!!! 同去鴻星差唔多喎!!!

BD 愛漫遊: 密碼114 Dr. Strangelove or How I Learned To Stop Worrying and Love The Bomb

2009-07-04T19:41:00.002+08:00

其實我一直有呢部電影既DVD版, 不過係百無舊版, 畫面亦只係4:3. 今次購入BD除為左可以闊螢幕欣賞, 亦可以睇埋一D製作特輯.
呢部戲算係Kubrick少見有玩味既黑色喜劇, 將冷戰再加上美國對共產主義既畏懼以荒謬事件去探討. 其中Kubrick搵來一班嚴肅演員去演, Peter Sellers一人分飾三個角色(原本要飾四角, 但因為陣前唔識去演譯而辭演該角), 突顯Peter Sellers既鬼馬長處. George C Scott又係演活忠心既將軍.
Kubrick能將一個嚴肅題材扭橋成喜劇, 已經係成功. 相對近似題材既"Fail Safe", 呢部更為可觀.
當然呢部1963既製作放到千禧年科技既BD上, 明顯與舊版DVD有好大對比. 畫質係比較實在, 輪廓係比較細緻.

Get Them Off Your Dog!

2009-07-03T00:33:00.001+08:00

成為疑似患者, 家居隔離正式開始

2009-07-02T22:08:00.002+08:00

六月我有三分二日子係病緊, 傷風咳一直都好過, 西醫中醫再西醫, 乜野型狀味道既藥丸都試過, 一日三次定一日四次, 三碗水埋一碗水. 到最後好在一星期, 率之上是期又黎過.
起初又係傷風咳, 諗住食幸福傷風素可以頂住檔, 點知越食越衰, 咳多兩錢重, 第二朝實在太病, 所以都係返唔到工. 星期一晚甚至發高燒. B出動佢殺手鐧: 退熱貼. 果然好勁! 真係退燒. 第二朝仲可以返工添, 點知當晚響公司已經發高燒, 終於頂唔順, 自己入左醫院急症室. 之但係入到急症室, 我D燒又退左, 不過佢地都為左安全計, 將我帶到隔離病房, 再由著到好似董太上身既醫生診斷我, 基本上係不停問我問題, 其中一題係: 你過去幾日有無接觸過豬流感患者? 講真, 接觸左都唔知! 結果醫生都係俾左一D藥俾我仲話如果食完藥都係未好, 就真係要到H1N1診所接受檢查.
今日, 藥又食晒, 但仍然係有傷風症狀. 咁我就帶住醫生寫俾我既轉介信去H1N1診所, 不過呢位醫生都認為可能只係普通傷風咳, 但為安全計, 我都係需要做測試與及做家居隔離三日.
諗唔到傷風可以搞咁耐...

P.S. Day 1: 去完診所再返公司執野交帶一切就返屋企, 不過返到屋企依舊要做公司野, 因為實在太忙!!

無線新聞事事旦旦之做到O 咀

2009-07-01T23:36:00.002+08:00

(圖片來源: tvg)

BD 愛漫遊: 瘋狂歷史遊: Mel Brooks' History of the World Part 1

2009-06-29T14:04:00.001+08:00

Mel Brooks對於香港觀眾黎講都算幾陌生, 不過佢既作品就影響左好多觀眾. 佢對喜劇同音樂既執著, 仲有佢既瘋狂意念, 都一直影響緊住後既喜劇方向.
呢一部將人類歷史從頭瘋狂地活現一次, 由猿人到羅馬帝國, 再到法國大革命, Mel Brooks都借古諷今. 當然亦唔少得佢拿手既歌舞, 今次更加係美高梅式歌舞場面. 不過, 論整體成績就不及前作"Blazing Saddles"甚至破格"Slient Movie". 前者徹底地玩轉西部片, 尤其尾場一班西部人物從片場佈景走到現實社會, 玩味十足. 後者破天荒係真正默片, 全片無對白, 只用字幕交代劇情.
可惜佢地電影暫時只推出左三部BD, 香港行貨更就只有兩部. 論收復程度, 呢部都甚為滿意. 再加上有幾多特別收錄, 算做一個唔錯既收藏.

濕晒地遊濕地公園

2009-06-28T12:59:00.005+08:00

上星期日B應邀佢地一班朋友去濕地公園一遊, 我作為家屬都掹車邊可以去. 一直都好想去呢個公園, 之但係每次想去唔係落雨打風, 就係病左去唔到. 今次啱啱病完, 終於有得去.
當日剛好有颱風影響香港, 所以天氣熱得有D狂. 所以B睇完鱷魚貝貝之後, 佢實在難抵炎熱天氣, 要獨自走番室內休息, 我就同佢一班朋友繼續行程.
我覺得呢個公園既特色, 雖然靠近住宅區但只需行多十分鐘又會係另一個世界. 不過行完成個公園, 真係成身濕晒, 果然貫徹濕....呢個字.

慘情歌??

2009-06-26T00:09:00.002+08:00

環球唱片就快推出一張精選碟, 精選歌曲都有同一特質, 當然呢D"暗啞底"既碟心照不宣. 只不過有網站刊出一份疑似官方宣傳文案有以下解釋:

「慘情歌」精選— 群星《田》

在這個經濟不景氣的年代，各大唱片公司為了保住生存空間，找尋活命的氧氣，各出奇謀，最常見的方法就是推出各式各樣的雜錦精選唱片應市。而製作精選方面的專家，則非香港的環球唱片公司莫屬，該公司十年來推出大量不同主題的精選唱片應市，主題豐富，屢創佳績，讓樂迷有機會可依據不同主題﹑歌手收藏心儀的舊歌，饒有心思，對樂壇的正面發展未嘗無功。繼早前推出過多張新歌大雜燴的暢銷精選《Love情歌集2008》﹑《Love Best 最愛情歌集2》﹑音樂人個人全紀錄《潘源良二五精神永不完全集》﹑《林敏驄都是愛情惹的歌》﹑以及一些歌手的個人全集《張國榮最熱》﹑《王菲阿菲正傳》後，環球在這個酷熱的六月又研發了全新的「慘情歌」精選系列，讓樂迷有系統地收錄一些精彩兼具代表性的「慘情歌」，而該系列的第一輯正是封面以四個空格子組成﹑包裝簡約兼附送貼紙讓受眾DIY碟名的粵語「慘情」精選——《田》。

整張歌曲共收錄十七首來自不同歌手﹑不同唱片公司的歌曲，年期為80年代末期到90年代初期的作品。光看歌手的陣容，牌面甚大，計有梅艷芳﹑譚詠麟﹑Beyond﹑王菲﹑達明一派﹑林憶蓮﹑張學友﹑黃凱芹﹑林子祥﹑葉蒨文﹑盧冠廷和鍾鎮濤等，都是位列一線的香港歌手，乍看起來已滿有吸引力。至於這些歌曲大抵都是旋律精彩，歌詞主題鮮明﹑內容一針見血，整體感染力強的作品，反映了多位本地音樂人﹑歌手在特定時空﹑特定地點的想法和心聲，表達著強烈的愁緒與哀思，當中的感情﹑價值觀，都是港人今日的「集體回憶」。加上當中不少歌都曾是主打作品，應該能引起不少毋忘香港過去生活和樂壇盛世的歌迷的共鳴。

誠然，碟中所選的作品都是佳作，曲子或悲切動人，或激昂慷慨，歌詞不失佳句和文眼，多年以後重聽，甚堪回味。若說當中值得重點推介的歌曲，著實不少，例如Beyond的「長城」﹑「歲月無聲」在慘情之餘，內容和題材均帶出強烈的搖滾精神，他們激昂且具真情實感的演唱，也把歌曲的主題和情懷成功放大。林憶蓮的「破曉」詞曲俱佳，歌詞淡淡幾筆已經寫出鮮明的情緒，具有強大的感染力量，歌者情切清麗的嗓音也是歌曲的一大吸引處。達明一派「十個救火的少年」筆鋒幽默精警，而黃耀明自己的「舞吧舞吧舞吧」也寫出「情變」後懺悔者的內心話，感情滿滿，亦是佳作。其他歌曲方面，「媽我沒有做錯」﹑「你知我知」﹑「問青空」﹑「漆黑將不再面對」都是不容錯過的佳作，而梅艷芳的「四海一心」則不禁叫人懷念這位值得支持的一代天后。

宏觀來說，音樂的作用除了是陶冶性情外，讓人自由自在地飛翔在想像的海洋外，更重要是使人找到心靈的寄託和真切的共鳴，覺得有一些歌可以代表自己的心聲，老了以後也有回憶的憑藉。雖然這張《田》收錄的都是一些流行﹑大路的慘情歌，但都是你我過去熟悉的流行作品。在這個沒有甚麼歌可以代表你的年代，這些昔日的老歌，應該能代表你的心聲？

文/ 李重言Stephen Lee (香港)

就連介紹甚至碟評連最基本既常識都欠缺, 難怪新一代對六四呢個主題咁忌諱同唔明白.

父親節快樂

2009-06-21T21:26:00.002+08:00

從陳奕迅MV看人生

2009-06-21T14:40:00.000+08:00

近年陳奕迅既部份MV都有著同一個主題: 人與人既感情.

夕陽無限好

從一個報攤道出人與人相處, 離離合合, 份外感人.

葡萄成熟時

人既感情收放自如, 但係咪人人可以呢?

沙龍

人生照相館, 將人生每個細節都拍下. (意念比官方既MV更佳)

生活炒雜碎(第十四回)

2009-06-20T12:54:00.004+08:00

前日返工, 響電梯大室赫見老細被救護員檯走送上救護車. 尤其見老細面青口唇白, 仲好似無知覺添真係嚇死我. 即刻車轆腳衝上公司又見成層既同事戴上口罩, 心諗唔係老細中左招卦? HR同事話老細只係好唔舒服, 但為左安全起見, 所以都係做足預防準備戴晒口罩. 可惜香港人就係咁, 少少野就驚到失控, 不出一個鐘, 全公司果十層樓成千人就流傳我地老細中左H1N1, 所以我地戴口罩同要隔離! 我甚至收到其他樓層既同事來電問老細係咪真係中左, 當然俾我鬧到落荒而逃. 不過我都等緊老細有乜最新消息.
直到傍晚, 老細向大家發出電郵話自己只係傷風未好晒再加胃病先至被送入院, 而家佢再做埋H1N1測試, 結果會呢兩日出黎, 我地就睇下老細星期一有無番工就知.
#############################################
事隔一年, 我響公司又掉位, 今次又回到窗口. 檯面面積"疑似"多左, 實質檯底空間就細左, 對於我呢個高人黎講, 差不多次次出入雙腳都撞到野.
#############################################
以往住響舊居, 要食D乜野都可以到樓下幾個大商場, 只係幾分鐘時間. 但係自從去年搬到新居, 因為屋苑並無任何商店, 要買野食野就要行20分鐘回到舊居既商場, 都幾唔方便. 所以自此愛上叫外賣.
屋企長年累月都有唔同外賣餐單, 老麥/KFC/Pizza Hut/Pizza Box/翠華...乜都齊. 起初都覺得ok, 不過近來服務每況愈下, 之前試過叫KFC, 送到上黎發現薯蓉沙律全部甩蓋, 搞到gravy同沙律醬流到成個袋都係, 就好似送外賣果位哥仔玩完過山車咁. 忍唔住打上去投訴, 點知位接電話妹妹話: 咁而家係咪要求賠番D薯蓉同沙律? 唉, 我話: 唔駛勒, 只不過希望同你地反映下可唔可以下次小心D呢? 話口未完, 另一次叫老麥更加誇!
落單時對方已講明因為訂單太多所以送遞時間需要75分鐘,(其實當時係平日下午三點) 我都覺得ok, 結果等呀等, 三點正叫, 四點四都未見影, 打上去問話早響廿分鐘前上左門口. 問題係75分鐘我等, 但而家90分鐘都黎緊都無得食就真係唔得囉. 講真上去食都無咁嬲, 我要求取消訂單, 對方又願意喎. 點知呢頭收線, 果頭位外賣哥哥又送到上黎. 唯有死死地氣無奈接受呢個又係玩完過山車既外賣, 汽水濺到成袋都係, 薯條稔晒, 個飽又四分五裂...
論外賣, 翠華外賣實在唔差. 至少做得乾乾淨淨, 老練咁遠送到黎D野食都係熱辣辣兼唔會走樣.
外賣我依舊叫, 但會提醒對方可唔可以小心D, 鬼叫自已懶....

大陸手機又再抽奧巴馬水

2009-06-19T22:19:00.003+08:00

除左大陸可以咁厚顏無恥老翻手機, 再用埋人地個總統張相去賣廣告, 相信真係無其他國家會咁做.
Blockberry, 真係一絕.

EMI至愛經典系列 Vs 華納/雨果LPCD 1630

2009-06-14T19:02:00.000+08:00

自從華納全面接管代理香港EMI既音樂業務, 就好前之前東亞收購華星娛樂後一樣, 拼命推出一系列精選. 較早前已經推出過"EMI至愛經典系列"既盧冠廷劉德華等等, 最近又推出葉振棠葉麗儀區瑞強等等精選.
記得之前EMI都曾經推出呢類精選, 其中有個系列"星聲傳集"可以話算係最可怕既一個系列, 聲音質緊完全不能接受, 其中某幾位歌星既某幾首歌完全係從黑膠唱片翻錄, 連黑膠獨有既炒豆聲都出埋. 反而之後所推出既"真存版", 以boxset型式去復刻全張大碟, 效果同精神反而好好. 但往後EMI授權俾人出既復刻碟又出現番翻錄黑膠既情況出現, 從而證實某幾張唱片可能因為母帶遺失或損壞而要靠翻錄黑膠去續命. 今次我買左葉振棠同埋區瑞強既"EMI至愛經典系列", 葉振棠既雙CD, 每隻歌既質素都非常之好, 再加華納用上DSD系統remastering, 音質比之前既精選CD更通透. 之前華納亦曾推出一批DSD混音既復刻大碟, 質素都係中上. 不過今次另一張區瑞強既精選情況有D唔同, 區瑞強響EMI只出過四張大碟, 一張新曲加精選再加一張EP, 確係有足夠既歌好似葉振棠咁出雙CD, 可惜今次又係單CD, 就連選曲同之前既"多一點精選集"或"星聲傳集"差唔多, 兼一樣有18首. 有好多歌反而從未再出版過, 例如"茶花女放假", 她的名字叫Shanghai", "留下的雨傘"甚至整張"許願"大碟既歌都未曾再推出過, 唔知係咪因為母帶遺失既問題. 最重要上次"多一點精選集"已經出現歌曲係翻錄自黑膠碟, 今次就算經DSD remastered, 質素並未有改善, 其中第2cut"鼓浪嶼"既炒豆及第16cut"戀愛罪人"既唱盤失速走音依然存在.相反華納推出由雨果唱片代工LPCD 1630復刻唱片, 比之前DSD系列更出色. 之前買左隻梅艷芳LPCD 45系列, 就算當年華星既錄音有幾差, 都令到每隻歌完全浮現出最佳狀態, 尤其當年所用都係真實樂器, 每樣聲音既定位都好出, 音場都廣闊得好多. 雖然今次華納呢批只係次一級既LPCD1630, 但每隻歌都可以重現接近當年母帶既質素. 尤其林憶蓮既"都市觸覺第一集", 同埋王傑"故事的角色"呢兩張公認靚錄音既大碟, 今次絕對比之前舊版CD更好聲.較早前響將軍澳某唱片舖發現有整批華納DSD復刻系列, 有幾張真係想入番, 在華納唔出普通版復刻唱片既時侯, 呢批DSD系列或者LPCD 1630系列會係個唔錯既入手.

北極人少企鵝多?

2009-06-14T00:38:00.004+08:00

北極有企鵝??? 笑鳥.

流感週

2009-06-13T15:38:00.002+08:00

無錯我病左成個星期. 今日都只係咳左五次.
時間回到六月三日, 下晝食完飯坐響公司, 突然發覺喉嚨有D痛, 心諗唔係又作病卦. 當晚, 喉嚨依然有D痛, 但無流鼻水咳, 直至星期四朝早, 先開始咳同流鼻水. 臨返工前到港鐵站既診所睇睇醫生先, 認為打個底做個預防都好. 間診所又換左醫生, 有時呢D醫療中心既唔好處就係成日轉醫生, 又或者醫生輪班制, 你睇開醫生A, 好唔好彩你今日病左, 但醫生A聽日先至上班, 唔通你要捱到第二日先去睇醫生嗎? 以往我就睇開一個男醫生, 今朝突然係變成女醫生駐診, 雖然佢地有我過去三年既病歷, 但每個醫生用藥都有分別. 今次呢位女醫生就俾左一大堆藥丸同藥水, 隻藥水仲要係荔枝味添! 不過幾日後我食晒成個療程既藥, 我既病情好似無乜大起息, 依舊鼻水長流又咳又喉嚨痛.
星期一返到公司有女同事叫我不如搵中醫, 咁大個仔真係未試過去睇中醫, 但呢位同事又講到中藥有幾神奇, 響咳到傻左之下真係去左公司附近一間藥材舖, 見位中醫仲後生過我, 總係有D怪怪. 其實我係信中藥療效, 只係對"把脈"呢家野存疑. 位後生仔同我"把脈"既時候, 我個心係響度諗: 究竟有乜野好聽呢? 跟住佢就寫左一張藥方叫我去櫃檯執藥. 當然現今既藥材舖都有呢種俾現代人額外既服務: 代客煎藥. 晏晝落單放工有藥拎. 當晚飯後無耐就飲左呢濟中藥, 唔係太難飲. 原本當晚已經咳少左. 但係食完濟藥大約一個鐘後, 我完全咳到無停. 由當晚十點開始一直咳到凌晨四點, 是夜B同我完全無瞓. 我甚至將自已隔離做廳長瞓梳化, 但實在太咳, B響房不停俾我咳醒. 究竟係我同D中藥唔夾定抑或D中藥有問題.
因為公司打緊扙, 咳到甩肺都係要返工. 同事問起食左中藥之後見效未? 我只有報以喪咳. 今次又有同事叫我睇西醫, 佢地話呢個西醫強項醫咳! 保証止咳云云... 況且呢個西醫又響公司附近, 唯有搏搏. 一去到我就有種"乃野"既感覺, 一直以黎, 我直覺如果個醫生真係醫術高明藥到病除, 照理診所一定"客"似雲來無時無刻都濟滿成間診所. 但呢間診所我一入去坐左成十分鐘都係無"客", (離開前都係無客) 我就有"乃野"既感覺. 一入到細細診証室, 係位中年醫生, 起初我同佢對答都係好"正常", 直至佢用聽筒聽我身體既一刻, 佢又問左我一大堆完全off topic既問題, 尤其對我身體甚有興趣. 起初一兩條我見佢係醫生都認真答, 但跟住發現佢開始有D古怪, 唯有事事旦旦答佢.(其中一條問題詳見我幾日前twitter) 當然最後佢亦有開左一大堆藥俾我包括可樂味既咳藥水同埋大個校褸鈕既藥丸. 當日食左第一次佢既藥, 果然藥到病除, 鼻水收晒咳都無埋. 不過藥力好短, 每六小時一次, 但去到第四小時, 鼻水同咳齊齊回歸. 兩小時後食完藥又一條好漢! 周而復始, 我個人感覺: 好流. 所以食左幾日後決定停藥. 另一個要停藥既原因, 係果粒臨瞓前食既特效藥, 原本設定係食完會好好瞓, 但係我食完之後成晚眼光光, 小腹仲有陣痛添! (反而另一種日間既膠囊藥丸就食到我好眼瞓!)
不過, 近呢兩日我已經咳少左, 就響呢個時間H1N1竟然響本土爆發. 其他人對我種"口罩人"更佳顧忌, 試過有日響港鐵上, 我一坐底, 坐響對面既大嬸立刻彈開走去第二卡.
我都希望我可以早日康復, 又H1N1既惡潮早日消退.

無線新聞事事旦旦示範作

2009-06-08T18:52:00.003+08:00

果頭一塊牌先俾人笑到面黃, 呢頭CCTVB又獻新猶, 午間新聞送上名校生中指送飯, 真係飽哂.
(有關鏡頭後來已被刪去)

香江歲月

2009-06-07T23:29:00.003+08:00

呢幾日大病留家, 所以有時間追劇. 呢套本來舊年就會推出既劇集DVD, 結果押後到今個月先至面市.
呢部電視劇於1984/1985期間推出, 正值香港對前途問題, 當時呢套劇推出之時, 正希望籍此鼓勵香港市民增加信心, 可惜似乎對信心問題做唔到D乜.
由1945講到八十年代, 籍一個大家庭同幾位小人物帶出香港既成長故事. 以當年水準, 尤其頭十集確係比較出色同細緻. 但往後果八集反而水準下降, 細緻度又或戲味接近以住港台單元水準.
現在睇番, 香港雖為踏腳石, 但至少每人都出盡力去爭取或努力工作. 現在港人口口聲聲以此為家, 但種種荒旦既工作態度, 都令人為此心寒.
影碟封面標榜數碼修復, 但睇完之後, 完全可以證實從未經修復. 菲林花痕每集都出現, 甚至可睇得出只係用番當年既beta母帶直接番印, 飛針, drop out有幾集都頗嚴重. 而且劇集有好多夜景, 當年菲林拍攝打燈又唔係打得咁好, 結果dub落beta後黑夜場面漆黑一片, 響電視上只見黑影郁動, 有聲無畫. 基本上如果真係有經修復, 影像質素應該可以好清楚, 可惜呢D政府野, 發行商又點會咁落本呢?

六謬四之二十一

2009-06-05T00:01:00.000+08:00

薪火相傳!

(圖片來源:tvg)

無線新聞事事旦旦

2009-06-04T23:48:00.003+08:00

簡直係今日highlight!

六謬四之二十

2009-06-04T01:30:00.000+08:00

到時見

六謬四之十八

2009-06-03T20:49:00.000+08:00

係囉, 一天到晚都喊無需平反, 究竟你知唔知果晚發生左乜野事? 定你係智障呢?

The Things You Said

2009-06-02T23:18:00.001+08:00

I heard it from my friends
About the things you said
I heard it from my friends
About the things you said

But they know me better than that
They know me better than that

They know my weaknesses
I never tried to hide them
They know my weaknesses
I never denied them

I heard it from my friends
About the things you said
I heard it from my friends
About the things you said

How can a view become so twisted
How can a view become so twisted

They know my weaknesses
I never tried to hide them
They know my weaknesses
You tried them

I get so carried away
You brought me down to earth
I thought we had something precious
Now I know what its worth

I heard it from my friends
About the things you said
I heard it from my friends
About the things you said

Ive never felt so disappointed
Never felt so disappointed

They know my weaknesses
I never tried to hide them
They know my weaknesses
Thought that you liked them

They know me better than that

六謬四之十三

2009-06-02T20:45:00.000+08:00

風味棧

2009-06-01T23:43:00.003+08:00

今年終於記得幫自己個郵政信箱續期, 俾完錢就要去醫肚. 郵局附近大把野食, 可惜午飯時間太多人等位. 突然諗起好幾條街以外, 父母屋企對面開左間雲南米線, 咁就決定去試.
店子細又多人, 結果坐得好唔舒服. 餐牌都係賣一般米線, 但我俾其中一個拖鞋雞扒米線吸引, 咁就叫左一個黎試. 心目中既然叫得"拖鞋雞扒", 至少塊雞扒都有番一定份量, 點知一上菜, 雞扒碎上, 就連擺番個型都慳番, 完全睇唔到"拖鞋"何在. 至於個米線底, 我order左小辣, 結果係味如清湯, 完全無辣味, 最弊係連芽菜都係得幾條, 相當唔得. 三十五蚊連凍飲, (杯可樂仲要係啤出黎!!) 有D唔值.

六謬四之一

2009-06-01T01:17:00.000+08:00

呢位同學, 天安門係中國一個地方, 地方係唔識自已流血架. ok? 快快去驗下自已既心智先啦.

身心康泰就唔好腳底按摩?

2009-05-31T20:10:00.003+08:00

B有日響屋苑平台花園散步時發現呢塊牌, 佢笑到收唔到聲. 留意英文譯本.

究竟市道係咪真係咁差?

2009-05-30T18:08:00.004+08:00

剛剛晏晝去飲茶, 響等位之際隔離有位坐輪椅既伯伯講左以下說話: "又話個市差, 又咪係咁多人去飲茶咁多人響商場買野, 都呃人既." 跟住有個女仔走埋去好惡咁講左兩句: 你又亂噏乜野呀?
亂噏? 小姐, 其實我都有同感. 過去果半年, 好多人都無左份工係真既, 公司要cut人或唔再請人係真既, 但係如果話市面生活質緊差左? 我又唔覺喎. 周圍既人都仍然大洗特洗經常消費, 或者身邊有太多呢D富貴人, 每逢有所謂開倉, 賴理賣衫定賣鞋, 有女同事都一定血洗一番. 亦有同事每隔三個月出國遊一轉, 呢頭先話邊度邊度好正, 果頭又話下星期又飛. 就算出街食飯都似乎無被經濟拖累, 就好似屋企附近一間以往人跡罕至既太興, 近月都經常爆滿. 附近間翠華更加唔駛講, 依舊要排隊等檯.
總觀網上, 手電相機電視依舊多人買賣, 分享帖更加源源不絕. 買藍光碟既更加係要一次過幾十張咁買, 計你二百一張, 那四十張連運費好歹都要八九千. 買新樓盤一樣豪, time to say goodbye都吸引到咁多人去入市(諗起隻歌都想笑!).
當然世界上有樣野叫信用卡, 再加埋安信兄弟果種唔負責任洗腦式宣傳, 我諗好多人都成身卡數. 所以我諗呢一刻仲好似繁華盛世, 但當卡碌爆既一刻, 新卡又唔批, 市道先至係最差. 到時周街空中飛人或者上樓自助BBQ都會經常出現, 到時又會有苦主出動鬧政府.
經過負債一役, 對自己財務都好小心, 呢一刻零卡數再加小量積蓄, 我都希望可以安然渡過未來更差既市況.
(不過我承認因為部手機失靈無晒聯絡, 我都諗緊買唔買新手電... 又要錢, sosad)

當唱片公司都抽樂迷水既時候...

2009-05-29T00:31:00.004+08:00

當唱片公司或音樂人不停叫人唔好download當老奉, 真金白銀去買音樂既時候, 原來連唱片公司都抽左樂迷水.
陳奕迅推出單曲"七百年後"時, 有位有心樂迷自製左個MV, 將歌曲加上卡通Wall-E片段完美結合, 引來一時佳話, 甚至對隻歌都好有正面評價.
點知唱片公司打蛇隨棍上, 將呢個網上MV變成Karaoke版推出, 就連原創人都唔知... 雖然原創人盜用卡通片段係唔o岩, 但唱片公司一個唔該盜用兼用黎謀利係咪罪加一等呢?
原創人MV:

唱片公司自製MV:

十二年沒有冬天

2009-05-28T23:31:00.002+08:00

錯解六四?

2009-05-24T16:02:00.005+08:00

【本報訊】皇仁書院兩名學生昨日在一個六四座談會上，指當年北京學生受外國利用，要推翻中共，又深信當年屠城是因學生先襲擊軍車、軍人，要引起內戰。兩人言論引來全場嘩然，經歷六四洗禮的學生領袖和傳媒人即場「教導」二人，彌補學校不教的失誤。
該座談會由中學生聯盟舉辦， 30多名學生出席。他們先觀看六四屠城片段，再由講者講述當年見聞。至討論時段，皇仁書院應屆會考生李文棋說，六四頗恐怖，屠殺造成生靈塗炭，但反問「如果冇六四會點？中國會更加好？」他又認為當時學生被資本主義國家利用，「美國想透過民主運動，推翻共產黨。」
另一皇仁生溫駿瑋持類似觀點，「當時有人話，要趕走共產黨，迎接國民黨返嚟。」他不相信軍隊先開槍殺人，「上網睇到學生攞刀去劈裝甲車，啲人仲可以燒死埋（軍人），做埋燃燒彈去襲擊。」他堅信民主不適合中國，「仲有好多文盲。」
出席座談會的支聯會副主席蔡耀昌叫二人拿出證據支持論點，「有啲市民擲吓石，你知唔知係乜時間呀？係解放軍開槍殺緊人呀！」應屆會考生黃綺婷說：「坦克車一碌過就死，我揸把刀啫，可以做得乜？」社民連立法會議員黃毓民不屑溫駿瑋所說，「你講嘅都係流，今時今日冇人再咁講，好佩服你！」當年目擊六四屠城的記協新聞自由小組成員麥燕庭教導二人，切勿道聽途說，「你唔明嘅問題，趙紫陽已有答案畀你。」
兩名皇仁生會後表示，他們有修讀中史，李文棋說：「因為考試冇考，老師冇乜點教（六四）。」溫駿瑋稱，他是從網上得到有關資訊，強調真相沒人知，「話柴玲係第一個走佬，好多都咁講；話解放軍殺好多人，睇嗰啲片段無殺人，佢哋對住人民紀念碑頂開槍。」

考試無考, 老師無(乜)教, 就連網上資訊都可以引發佢地既無限幻想. 呢一代無思想只得幻想, 難怪現在世界只會倒後行而唔識反思同進步.
呢兩位同學真係讀屎片!

http://hk.apple.nextmedia.com/template/apple/art_main.php?iss_id=20090524&sec_id=4104&subsec_id=11867&art_id=12794444

日日足三両

2009-05-23T17:16:00.004+08:00

尋日諗食晏時突然靈光一閃, 老麥最近將足三両全日供應, 其實之前晚上供應時都試過一次. 不過因為太夜, 同B一齊分享一個包都飽到想嘔. 今次心諗日光日白當正餐, 就算double足三両都應付到卦...食完後, 原來份量都ok, 不過如果薯角减半或改番薯條或者效果更佳. 最正係兩塊厚牛肉都多汁, 並唔太乾, 只係頂層太多汁同芝士, 反而包底過乾, 唔太平均.去到今日, B又話要整個老麥午餐, 結果又encore足三両. 今次只叫普通足三両, 份量減少左, 但似乎比double更易入口, 唔會因為底層太乾影響口感.

Never Let Me Down Again

2009-05-22T05:05:00.000+08:00

blog友的一餐

2009-05-21T22:03:00.000+08:00

(來自tvg)

陳志雲：教你如何識撈

2009-05-21T14:03:00.003+08:00

哼~ 一句:教你如何識撈, 個齋字又踩地, 呢鑊真係銑死佢! 哈哈!

伸延閱讀: 攞景又贈慶 - 香港仔公國

終於有覺好瞓

2009-05-20T10:42:00.000+08:00

之前講過前排頻頻失眠, 就算周末前後都可以失眠. 用盡所有辦法, 結果都係成晚眼光光.
有日去Body Shop買洗面膏, 佢地向我sell呢隻"Deep Sleep"既噴霧, 成份有有機甘菊, 棗子精華, 天竺葵、杜松同埋廣藿香香薰精華油只要噴少少響身或枕頭就可以令人鬆弛容易入睡. 第一晚我嘗試噴少少響頸同手就走去瞓, 但似乎仍然有半晚眼光光. 第二晚就試噴落枕頭, 果然當晚一睡到底. 起初我都怕會倚賴, 所以試一兩晚唔噴, 結果係50/50, 有時仍然眼光光, 有時仍有聒睡. 我諗我仍然會用呢種噴霧, 至少平日都要有覺好瞓.

華星三寶

2009-05-19T23:35:00.001+08:00

原來華星三寶拍過大激想既廣告之外, 原來仲拍新都城廣告!

Mad Men 廣告狂人

2009-05-18T06:13:00.000+08:00

嘩!! 我愛台灣!!! 只因等極香港電視台都未見有買呢套劇, 台灣已經有公司買左直出碟. 一盒四碟十三集再外加特別收錄算交足功課, 只可惜碟首有段超級煩加超級膠既台灣發行公司既短片交代屋企睇碟係唔駛熄電話.
暫時只睇左第一集, 已經好想追落去. 近年美劇少見會拍六十年代既題材, 唔係現在就係古代, 中間既時光好似消失左. 所以呢套份外吸引, 我諗一有時間會繼續追落去.

SONY Music - Pure Gold Series

2009-05-17T18:55:00.005+08:00

香港樂壇早兩年興起既復刻潮, 去到呢一刻以為真係已經過氣. 諗唔到較早前再鯨吞BMG後"又"改名既SONY music又再回帶推出呢個"Pure Gold Series". 又係將以往CBS/SONY, Sony Music, 現代唱片, BMG時代既出品以金碟型式出版. 記得好多年前CBS/SONY時代已經出過一次金碟"回帶", 就算之前以SONY BMG名義出既經典系列都已經將呢幾間唱片公司六七成既作品出過. 今次再出諗住有D補遺, 點知有D又係出完又出既回帶西. 響揀唔落手之下只執左呢兩張, 番到屋企一拆開, 咦? 歌詞都慳番!! 上次經典系列五十蚊都有歌詞啦, 今次索價六十幾竟然歌詞都慳埋, 實在有D過份. 雖則金碟對音色確係有少少幫助, 尤其CBS/SONY呢批後期數碼錄音真係好靚聲. 不過用六十幾蚊去回帶就真係見仁見智.

無味神棍

2009-05-17T17:52:00.002+08:00

諗住去個博物館日, 點知去到先知記錯日子, 唯有速速走去醫個肚.
記得之前去"霸王山莊"曾經都唔錯, 所以番兜. 但唔知點解一入到去, 好似入錯左舖頭. 下午茶時間大多數都係十零廿蚊, 當然亦有三十零蚊既炒粉麵或者四十零蚊小菜. 價錢都ok架, 點左個酸辣湯, 排骨趟, 小籠包, 醉雞同埋高力豆沙, 上菜先知出事.
落單無耐小籠包同高力豆沙(!!!)已經火速送上, 跟住話午市無醉雞喎. 下?? 咁又會出現響下午茶張菜單上面既? 唯有改叫客水晶牛肉包.
小籠包皮太薄一拎就穿, 排骨麵完全無味, 湯清如水, 排骨疑似白灼. 所謂水晶牛肉包, 又咪係普通牛肉包! 最弊係皮厚肉又無味.
總之成餐飯除左個酸辣湯喪辣之外, 其餘都係口啖啖. 就連服務都差到無朋友, 明明坐近門口當眼位, 叫極人都無反應, 只因大家寧願打牙較. 哼! 一毫子貼士都唔俾呀!!!

P.S. 原來太興冰鎮奶茶細杯左, so sad.

my little airport - donald tsang, please die

2009-05-15T18:27:00.000+08:00

電話判官

2009-05-15T13:53:00.000+08:00

勁!

BD 愛漫遊: Twister 龍捲風暴

2009-05-14T23:55:00.003+08:00

"Speed" (港譯: 生死時速)既成功除左因為男主角, 仲因為有個唔錯既劇本. 至於導演Jan De Bont始終係首回執導, 甩漏梗會有. 但佢去到第二部作品, 竟然係無進步之餘, 仲再退一步. 由劇本演員導技都不濟. 單靠特技實在救唔到幾多. 成部片係故事有故事去, 演員無戲可演, 特技係勁但流於推砌, 連最簡單做少少效果去遮去唔應該出現既陽光都做唔哂, 簡直係個災難.
但想唔到往後既"Speed 2", "The Haunting"更加慘不忍睹. 我諗Jan De Bont都係做番攝影師比較適合.
呢張BD畫質確係唔錯, 再加上有少量特別收錄, 作為一個反面教材, 值得收藏.

辦公室無聊問答

2009-05-13T11:24:00.000+08:00

1. 有pantry的話, 你會在那裡洗手而不去洗手間嗎?
唔會, 因為公司個pantry仲污糟過洗手間

2. 一天會沖多少杯/次水?
除非病左, 否則好少飲公司水.

3. 每星期有多少餐午飯是飲茶/茶餐廳/大家樂?
飲茶:除非同事生日/ 茶餐廳:三餐/ 大家樂:一餐

4. 一天去多少次洗手間?
早午晚三次

5. 你的cubicle看到風景嗎?
以前有無敵維港景(見上圖), 搬左位後面壁.

6. 天天也和同事午餐?
無左好耐, 日日食自已

7. 午飯時段都去購物?
有時會, 但多數去書店同拮豬島

8. 有什麼怪習慣/奇怪私人物品放在公司?
全日喪播歌或收音機/多年同事送俾我既聖誕禮物

9. 有帶飯習慣嗎?
無, 懶!

10. 最討厭的人/事物
E小姐or懶蟲/去小便俾某同事裝...

11. 試過第一個上班要開門/鎖或最後一個下班要鎖門嗎?
公司用職員証開門, 無鎖亦唔會鎖

伸延閱讀: 辦公室無聊問答 - Blah Blah Blah

陳奕迅於心有愧

2009-05-12T17:36:00.001+08:00

BD 愛漫遊: It Could Happen to you 傾城佳話

2009-05-10T17:17:00.002+08:00

近日除左響公司入左好多DVD, 亦都響街入左幾張BD藍光碟. 近來出既BD藍光碟除左有新片, 仲有D屬於經典電影系列又或者比較熱門既舊片.
單係尋日已經響一日內連睇兩部戲, 其中比較鍾意係呢套"傾城佳話". 正如版友話齋, 真係好懷念Nicolas Cage以往小本製作或喜劇既演出. 呢套戲佢演出一個好人, 真係演得恰到好處, 對比飾演佢老婆既Rosie Perez既誇張萬倍既演譯, 確係令人更信服. 另外久違既Bridget Fonda亦都演得好好, 可惜佢近年歸忍, 少左演出, 懷念佢既Single同埋SWF.
導演Andrew Bergman向來都係保証, 只係自從拍過爛片Striptease後就完全無晒佳作. 呢部片佢將一個真實故事改編得比較戲劇化, 比現實故事更引人入性. 正如佢既"Honeymoon in Vegas"既故事比用同一條橋既"Indecent Proposal"更討好.
但呢隻BD既畫質並無我想像之中咁好, 只係算比DVD較佳, 碟中除左導演講評亦都無任何收錄. 不過因為之前我無買過呢部戲既VCD/DVD, 呢隻BD都算係比較上佳既收藏.

是日瘋狂入手

2009-05-07T23:44:00.003+08:00

大清早收到公司內部電郵話已結業既影帶部門朝早有員工清貨大減價, 大家真係丟低工作衝落樓下執平野. 上次十蚊一張電影DVD已經超割喉, 今次更加只係五蚊一張講真吸引力加倍!
場內一二三區港美韓日版DVD乜都齊, 大家真係好似唔駛錢咁不停掃貨. 我都執左十幾套戲外加電視劇集兩輯. 有D甚至係絕版碟又或者連佢地既公司library既孤本都拎埋出黎賣. 其中有部戲之前B曾經問過佢地有無存貨, 但影視部門既同事話已經絕版唔會再出, 但諗都諗唔到竟然響今次大清貨中搵到隻佢地既library copy, 好運到底~